Álemdegi eń iri muzdyq tolyqtaı erip ketti
ASTANA. KAZINFORM — 2025 jylǵa deıin álemdegi eń iri aısberg sanalǵan A23a Ońtústik muhıtta dreıf kezinde tolyqtaı ydyrap ketti. Bul týraly Arktıka jáne Antarktıka ǵylymı-zertteý ınstıtýtynyń baspasóz qyzmetine silteme jasap BELTA jazdy.
Ǵalymdardyń málimetinshe, sońǵy 40 jyl boıy baqylaýda bolǵan alyp muz kesegi óz «ǵumyryn» aıaqtaǵan. Aısberg usaq bólikterge bólinip, ómir súrý kezeńinde jalpy aýmaǵynyń 99%-yn joǵaltqan.
A23a aısbergi 1986 jyly Fılhner shelftik muzdyǵynan bólinip shyqqan. Sol kezde onyń aýdany shamamen 4170 sharshy shaqyrym bolǵan. 30 jyldan astam ýaqyt boıy ol Ýeddell teńiziniń ortalyq bóliginde qaırańǵa tirelip turǵan, keıin Antarktıda jaǵalaýy boıymen qozǵala bastady. 2023 jyldyń qarasha aıynyń ortasyna qaraı ashyq sýǵa shyqqan.
2025 jyldyń basynda aısberg Ońtústik Georgııa aralyna jaqyndap, odan 80 shaqyrym jerde qaıtadan qaırańǵa otyrǵan. Ol jerde 2025 jyldyń qańtarynan mamyryna deıin turyp, keıin shyǵys jaǵynan aınalyp ótip, qozǵalysyn jalǵastyrdy. Sol jyldyń tamyz aıynyń sońynda aısbergten aýdany 60-tan 300 sharshy shaqyrymǵa deıingi úsh iri bólik bólinip ketti. Osydan keıin ol eń iri aısberg mártebesinen aıyryldy.
Mamandardyń aıtýynsha, 2025 jyldyń qańtarynda onyń aýdany shamamen 1300 sharshy shaqyrym bolsa, qazirgi tańda 50 sharshy shaqyrymnan da az qalǵan. Sońǵy úsh aıda aısberg shamamen 1000 shaqyrym jol júrip, Ońtústik jáne Atlant muhıttarynyń shekarasynan ótip, 49° ońtústik endik mańynda ornalasqan. Qazir ol ashyq sýda dreıf jasap, birtindep tolyq erip jatyr.
Aıta ketıeik, byltyr álemdegi muzdyqtarda 408 gıgatonna muz eridi.