Álemdegi eń qymbat saýda kóshesi belgili boldy

ASTANA. KAZINFORM — Nıý-Iorktegi Besinshi avenıý álemdegi eń qymbat saýda kósheleriniń reıtınginde qaıtadan birinshi orynǵa ıe boldy, dep habarlaıdy CushmanWakefield.

Pıataıa avenıý v Nıý-Iorke SShA
Foto: wikipedia.org

Cushman & Wakefield halyqaralyq konsaltıngtik kompanııasynyń Main Streets Across the World 2026 zertteýiniń dereginshe, sońǵy bir jylda Joǵarǵy Besinshi avenıýdegi saýda oryndarynyń jaldaý aqysy 35 paıyz ósip, jylyna bir sharshy fýt úshin 2 700 dollarǵa jetken. Bul bir sharshy metrge shaqqanda jylyna shamamen 29 myń dollar nemese 13,1 mln teńge bolady. Osynyń nátıjesinde Besinshi avenıý reıtıngte úshinshi orynnan birinshi orynǵa kóterildi. Ol bul oryndy sońǵy ret 2023 jyly ıelengen bolatyn.

Reıtıngte ekinshi oryndy Londondaǵy Nıý-Bond-strıt ıelendi. Munda bir sharshy fýttyń jyldyq jaldaý aqysy 2 230 dollardy (shamamen 1 mln teńge) quraǵan. Al úshinshi oryn Mılandaǵy Vıa Montenapoleone kóshesine buıyrdy. Ondaǵy kórsetkish 2 160 dollarǵa (shamamen 975 myń teńge) jetken.

Jalpy, álemdegi 147 jetekshi saýda kóshesinde jaldaý aqysy jergilikti valıýtaǵa shaqqanda orta eseppen 3 paıyz ósken.

Ekonomıkalyq turaqsyzdyqqa qaramastan, joǵary sanattaǵy saýda oryndaryna suranys báseńdegen joq.

Muny álemniń 30 iri saýda kóshesinde jalpy aýmaǵy 815 myń sharshy fýttan (75,7 myń sharshy metr) asatyn 153 jańa jaldaý shartynyń jasalyp, dúkenderdiń ashylýy da kórsetedi. Jańa jalǵa alýshylardyń 80 paıyzdan astamy bul kóshelerde buryn bolmaǵan saýda jelileri bolsa, jalǵa alynǵan oryndardyń shamamen 90 paıyzyn halyqaralyq brendter ıelengen. Al suranystyń negizgi bóligin sándi kıim dúkenderi qurady.

Jaldaý aqysynyń ósýi álemniń dástúrli saýda ortalyqtarynan tys jerlerde de baıqalady. Máselen, Maıamıdegi Brıkell býlvarynda jaldaý quny 43 paıyz, Ostındegi Saýt-Kongress kóshesinde 20 paıyz, Mýmbaıdaǵy Lınkıng-roýdta 28 paıyz, al Býharestegi Kalıa-Vıktorıeı kóshesinde 29 paıyz ósken.

Cushman & Wakefield dereginshe, saýda oryndary, meıramhanalar, qonaqúıler men oıyn-saýyq nysandary shoǵyrlanǵan kópfýnktsııaly qalalyq aýdandardyń damýy kelýshiler sanyn arttyryp, saýda jelileriniń qyzyǵýshylyǵyn kúsheıtedi.

Kompanııa sarapshylarynyń boljamynsha, úzdik saýda oryndary úshin báseke áli de joǵary deńgeıde bolady. Bólshek saýda salasynda satyp alýshylarmen baılanys ornatý, taýar qoryn basqarý sııaqty baǵyttarda JI men tsıfrlyq tehnologııalardyń mańyzy arta túsedi. Alaıda brendtiń tanymaldylyǵyn qalyptastyrýda jáne tutynýshylardyń saýda tájirıbesin jaqsartýda dástúrli dúkenderdiń orny saqtalady.

Buǵan deıin zymyran shabýylynan Ár-Rııadtyń eń záýlim ǵımarattarynyń biri búlingeni habarlanǵan bolatyn.