Álemdegi eń qart stıýardessa ómirden ótti
ASTANA. KAZINFORM — Álemdegi eń uzaq qyzmet etken stıýardessa Bett Nesh 70 jylǵa jýyq úzdiksiz qyzmetten keıin 88 jasynda qaıtys boldy, dep jazady VVS.
Neshtiń qaıtys bolǵanyn ol qyzmet etken American Airlines kompanııasy málim etti.
«Mansabyn 1957 jyly bastaǵan Bett Nesh eń uzaq jumys istegen stıýardessa retinde Gınnestiń rekordtar kitabyna engen. Ol stıýardessalardyń birneshe tolqynyna shabyt berdi», — dedi áýe kompanııasy.
Nesh 21 jasynda American Airlines kompanııasynyń aldyndaǵy Eastern Airlines kompanııasynda ózi turatyn Vashıngton men Boston arasyndaǵy reısterde jumys isteı bastady. Ol ár túnin úıinde ótkizý úshin osy qysqa joldy tańdaǵan.
Birneshe jyldan keıin baǵytyn ózgertýge oqtalǵanymen eki qalanyń ortasynda ushýdy jalǵastyra berdi. Nátıjesinde ony jıi ushatyn jolaýshylardyń bári tanyp aldy jáne jaqsy kórip ketti.
«Adamdardyń bári birdeı. Bárine keregi — azdaǵan mahabbat», — dedi ol 2017 jyly BBC News fılıaly CBS-ke bergen suhbatynda.
Keıbir amerıkalyq aqparat quraldarynyń habarlaýynsha, ol 17 mamyrda hospıste qaıtys bolǵan. Jaqynda oǵan sút beziniń qaterli isigi dıagnozy qoıylǵan edi.
Bett Nesh kásipodaq múshesi bolǵan kásibı bortserikter qaýymdastyǵy da kóńil aıtty.
«Osy qıyn ýaqytta onyń otbasy jáne dostarymen birgemiz. Bett — bizdiń tarıhymyzdyń ajyramas bóligi jáne biz ony umytpaımyz», — deıdi kásibı bortserikter qaýymdastyǵy.
Aıta keteıik, Bett Nesh 2022 jyly 86 jasynda álemdegi eń qart stıýardessa retinde Gınnestiń rekordtar kitabyna engen.
