Álemdegi eń qart marafonshy Úndistanda jol apatynan qaza tapty

ASTANA. KAZINFORM – 1911 jyly Úndistanda dúnıege kelgen Faýdja Sıngh «Sáldeli tornado» laqap atty 89 jasynda marafon qatysyp, júgire bastaǵanda alǵan. Ol áıeli men ulyn joǵaltqannan keıin Anglııaǵa kóship baryp, jarystarǵa qatysqan, dep habarlaıdy DW.

– Júgirý meni ómirge qaıta ákeldi. Ol maǵan meıirim tanytyp, barlyq jara men qaıǵymdy umyttyrdy, – degen edi ol CNN telearnasyna bergen suhbatynda.

Bala kezinde, ıaǵnı 5 jasqa deıin aıaǵyndaǵy aqaýǵa baılanysty júre almaǵan Sıngh 42 shaqyrymdyq marafondy toǵyz ret júgirip ótken. Jeke rekordyn ol 2003 jyly Toronto marafonynda ornatyp, qashyqtyqty 5 saǵat 40 mınýtta júgirip ótken. Al sońǵy ret 2013 jyly Gonkongte 10 shaqyrymdyq jarysqa qatysqan. Bul oqıǵa Londonda ótken 2012 jylǵy Olımpıadada alaý ustaǵan sátinen bir jyl keıin bolǵan.

114 jastaǵy Faýdja Sıngh resmı túrde Gınnestiń rekordtar kitabyna enbese de, álemdegi eń qart marafonshy retinde tanyldy. Sebebi onyń týǵanyn rastaıtyn týý týraly kýáligi bolmaǵan. Soǵan qaramastan, ol 100 jasqa tolǵanda Ulybrıtanııa patshaıymy ІІ Elızavetadan quttyqtaý hatyn alǵan.

Úndistan polıtsııasynyń málimetinshe, belgisiz kólik Pendjab shtatyndaǵy týǵan aýyly Bıas mańynda jaıaý ketip bara jatqan Sınghti qaǵyp ketken. Ol aýrýhanada bas súıegi men qabyrǵasyna túsken aýyr jaraqattardan kóz jumǵan.

Aıta keteıik, buǵan deıin Brazılııada álemdegi eń qart áıel 116 jasynda qaıtys bolǵanyn jazdyq.