Álemdegi eń qart er adam 112 jasynda dúnıeden ozdy

ASTANA. KAZINFORM – Ulybrıtanııada «Tıtanık» sýǵa ketken jyly týǵan, eki dúnıejúzilik soǵys pen ıspan tumaýy jáne koronavırýstan aman qalǵan Djon Alfred Tınnısvýd 112 jasynda qaıtys boldy, dep habarlady seısenbide Gınnestiń rekordtar kitaby. Bul týraly VVS jazdy.

Gınnestiń rekordtar kitaby ony birneshe aı álemdegi eń qart er adam dep tanyǵan bolatyn. Tınnısvýdqa bul rekord osy jyldyń sáýir aıynda venesýelalyq Hýan Vısente Peres Mora 114 jasynda qaıtys bolǵan sátte buıyrǵan.

Brıtandyq azamat 1912 jyly tamyzda Lıverpýlde dúnıege kelgen.

Ol óziniń áıeli Blodvenmen Lıverpýldegi bı keshinde kezdesken jáne olar 1942 jyly úılengen. Olardyń qyzy Sıýzan 1943 jyly dúnıege kelgen jáne erli-zaıyptylar Blodven 1986 jyly qaıtys bolǵanǵa deıin 44 jyl birge ómir súrdi.

Tınnısvýdtyń artynda qyzynan basqa tórt nemeresi men úsh shóberesi qaldy.

Ekinshi dúnıejúzilik soǵystan keıin ol Ulybrıtanııanyń Koroldik poshta qyzmetinde, sodan keıin Shell jáne BP kompanııalarynda esepshi bolyp jumys istedi.

Tınnısvýd 1972 jyly zeınetke shyqty.

Tınnısvýd buryn «óte belsendi» jáne «kóp serýendegenin» málimdegen, biraq ol nege mundaı uzaq ómir súrgenin bilmeıtinin aıtty.

Qazir jer betindegi eń qart adam jáne eń qart áıel ataǵy 116 jasta bolǵan japondyq Tomıko Itookaǵa tıesili.

Uzaq ómir súrý rekordyn ornatqan er adam – 116 jyl 54 kún ómir súrgen japondyq Dzıroemon Kımýra. Ol 2013 jyly qaıtys boldy.

Longeviquest saıtynyń málimetinshe, qazir álemdegi eń qart er adam – brazılııalyq Joaý Marıý Neto, onyń jasy 112 jas 52 kún.