Álemdegi eń kári qyzyl panda Gınnestiń rekordtar kitabyna engizildi

ASTANA. KAZINFORM — Japonııada Fýta atymen tanymal qyzyl panda haıýanattar baǵyndaǵy qyzyl pandalardyń eń kárisi retinde Gınnestiń rekordtar kitabyna engizildi. Bul týraly Jiji Press jazdy.

Álemdegi eń kári qyzyl panda Gınnestiń rekordtar kitabyna engizildi
Foto: Kyodo

Rekord tirkelgen sátte Fýta 23 jas 135 kúndik boldy. Ol mekendeıtin Tıba haıýanattar baǵynda osy oqıǵany atap ótý úshin arnaıy rásim ótti.

Fýta 2003 jyly 5 shildede Japonııanyń ortalyǵyndaǵy Nıhondaıra haıýanattar baǵynda týǵan. Bir jyldan keıin ol qazirgi mekeni Tıbaǵa aýystyryldy.

Fýta 2005 jyly artqy aıaqtarymen turatyn erekshe ádetiniń arqasynda tanymal boldy. Keıinirek ol tipti teledıdardaǵy jarnamalarda boı kórsetip júrdi.

Álemdegi eń kári qyzyl panda Gınnestiń rekordtar kitabyna engizildi
Foto: Jiji Press

Sarapshylardyń baǵalaýynsha, Fýtanyń jasy qazir adam ómirimen ólshegende júzden asqan. Haıýanattar baǵynyń málimeti boıynsha, kórý qabiletiniń nasharlaýyna jáne eki aıaǵymen turý qabiletiniń joǵalýyna qaramastan, pandanyń tábeti jaqsy ári densaýlyǵy qalypty.

Fýta búgingi tańda pandalar arasyndaǵy kádimgi úbirli-shúbirli qarııa. Nemere, shóbere, shópshegi bar, tipti nemenesiniń ózi beseý.

Buǵan deıin Qytaıdaǵy alyp pandalar popýlıatsııasy 830-ǵa jetkenin habarlaǵan edik.

Al Olımpıada chempıony Mıhaıl Shaıdorov — pandalardyń eń úlken jankúıeri.