Álemdegi eń dáýletti 500 adamnyń baılyǵy bir kúnde júzdegen mlrd dollarǵa ósti
ASTANA. KAZINFORM – Álemdegi eń aýqatty 500 adamnyń jıyntyq baılyǵy bir táýlikte rekordtyq $336 mlrd-qa ósti. Bloomberg málimetinshe, Bloomberg Billionaires Index reıtınginiń qatysýshylary baqylaý tarıhyndaǵy eń iri bir kúndik ósimdi tirkedi.
Álemdegi eń baı 500 adamnyń aktıvteri $336 mlrd-qa artyp, olardyń jalpy baılyǵy $13,3 trln-ǵa jetti.
Kúnniń basty benefıtsıary Ilon Mask boldy. Onyń baılyǵy $164 mlrd-qa ósip, bul kórsetkish tizimdegi qalǵan 499 qatysýshynyń jıyntyq ósimimen shamalas boldy. Mask álemdegi eń baı adam mártebesin saqtap qaldy.
Buǵan deıin kásipker tarıhta kapıtaly $1 trln mejesinen asqan alǵashqy adam atanǵan edi. Baılyqtyń kúrt ósýi ózi negizin qalaǵan SpaceX kompanııasynyń aktsııalary bırjada saýdalana bastaǵannan keıin boldy. Aktsııa baǵasy bir qaǵaz úshin $163-ke deıin kóterilgen.
Tehnologııalyq sektordyń ózge ókilderi de aıtarlyqtaı tabysqa keneldi. Meta kompanııasynyń negizin qalaýshy Mark Tsýkerberg baılyǵyn $9,16 mlrd-qa arttyrsa, Oracle kompanııasynyń teń quryltaıshysy Larrı Ellısonniń kapıtaly $8,92 mlrd-qa kóbeıdi.
Google negizin qalaýshylar Larrı Peıdj pen Sergeı Brın tıisinshe $7,61 mlrd jáne $7,01 mlrd-qa baıydy. Al Amazon kompanııasynyń negizin qalaýshy Djeff Bezostiń dáýleti $6,96 mlrd-qa ósti.
Qazirgi ýaqytta reıtıngtiń ekinshi satysynda aktıvteri $314 mlrd bolatyn Larrı Peıdj tur. Odan keıin Sergeı Brın ($292 mlrd), Djeff Bezos ($267 mlrd) jáne Larrı Ellıson ($247 mlrd) ornalasqan.
Ósim reıtıngtiń joǵarǵy bóligindegi mıllıarderlermen ǵana shektelgen joq. Bloomberg málimetinshe, álemdegi eń baı 500 adamnyń tizimin túıindeıtin sońǵy 12 qatysýshynyń árqaısysynyń baılyǵy da rekordtyq deńgeıge jetip, keminde $7,9 mlrd boldy.
Bloomberg Billionaires Index reıtıngi 2012 jyldan beri jarııalanyp keledi jáne álemdegi eń baı 500 adamnyń dáýletin baqylaıdy.
15 maýsymdaǵy nátıje ındeks tarıhyndaǵy eń iri bir kúndik ósim retinde tirkeldi.
Buǵan deıin SpaceX aktsııalary baǵasynyń kúrt qymbattaýynan keıin kompanııa Amazon-dy basyp ozyp, álemdegi naryqtyq quny eń joǵary besinshi kompanııa atanǵany habarlandy. Al kompanııa qojaıyny Ilon Mask álemdegi alǵashqy trıllıoner atandy.
