Álemdegi eń bıik ǵımarattar reıtıngi ózgerýi múmkin
ASTANA. KAZINFORM — Parsy shyǵanaǵy elderinde salynyp jatqan jańa záýlim nysandar álemdegi eń bıik ǵımarattar reıtıngin ózgertýi múmkin, dep habarlaıdy Kazinform agenttiginiń menshikti tilshisi.
Saýd Arabııasyndaǵy Djıdda-Taýer men BAÁ-degi Býrdj-Azızı munaralarynyń qurylysy aıaqtalǵan soń, álemdegi eń bıik ǵımarattar reıtınginde tıisinshe birinshi jáne úshinshi orynǵa jaıǵasýy múmkin. Olar Dýbaıdaǵy Býrdj-Halıfamen birge álemdegi eń bıik úsh ǵımarattyń qataryna enedi, dep habarlaıdy Arabian Business.
Qyzyl teńiz jaǵalaýynda salynyp jatqan Saýd Arabııasyndaǵy Djıdda-Taýer munarasynyń bıiktigi bir shaqyrymnan asady dep josparlanǵan.
Qurylysty 2028 jyldyń sońynda aıaqtaý kózdelip otyr. Buǵan deıin joba birneshe ret keıinge shegerilip, qurylys birneshe jyl boıy toqtap turǵan.
Joba tolyq júzege assa, bıiktigi 1 000 metrden asatyn Djıdda-Taýer álemdegi eń bıik ǵımarat atanady. Osylaısha 2010 jyldan beri 828 metrlik bıiktigimen álemdik rekordty saqtap kele jatqan Dýbaıdaǵy Býrdj-Halıfadan da ozady.
Saudi Binladin Group jobasynyń aǵa atqarýshy dırektory Ien Norman Mıllerdiń aıtýynsha, Djıdda-Taýer munarasynyń qurylysy 118-qabatqa deıin jetip, bıiktigi shamamen 474 metr bolǵan. Bul álemdegi eń bıik turǵyn úı sanalatyn Nıý-Iorktegi Central Park Tower ǵımaratynyń bıiktigimen shamalas.
Qazir munaranyń qurylysy júrip jatyr. Joba boıynsha ol 157 qabattan turady.
Jeddah Tower's construction has restarted with completion expected in 4-5 years. @ArchDigest talked to the developer, Jeddah Economic Company and confirms they are currently assessing bids “to select a contractor within 2-3 months.” Stay tuned! https://t.co/d4ZRzqo1ZR
— Adrian Smith + Gordon Gill Architecture (@smithgillarch) May 8, 2024
Munarada Four Seasons qonaqúıi, elıtalyq turǵyn úıler, keńseler jáne jobany ázirleýshilerdiń aıtýynsha, álemdegi eń bıik sholý alańy ornalasady. Záýlim ǵımarat «Djıdda ekonomıkalyq qalasy» jobasynyń sáýlettik sımvoly bolmaq.
Djıdda-Taýer munarasynyń jobasyn amerıkalyq Adrian Smith + Gordon Gill Architecture sáýlet bıýrosy ázirlegen. Newsweek basylymynyń jazýynsha, jobanyń avtorlarynyń biri — Dýbaıdaǵy Býrdj-Halıfa munarasyn da jobalaǵan sáýletshi Adrıan Smıt.
Djıdda-Taýer munarasynyń pishini jas palma japyraqtarynyń shoǵyryn eske túsiredi. Al qasbetindegi oıyqtar kóleńke túsirip, nysannyń qyzýyn azaıtady.
Bolashaqta álemdegi eń bıik úsh ǵımarattyń qataryna enýi múmkin ekinshi nysan — Dýbaıdaǵy Sheıh Zaıd kóshesinde salynyp jatqan Býrdj-Azızı munarasy. Onyń jobalyq bıiktigi — 725 metr.
Azizi Developments kompanııasy munara qurylysyn 2028 jyly aıaqtaýdy kózdep otyr. Alaıda joba ázirge bastapqy kezeńde.
Qazir negizgi qurylys úderisi irgetas plıtasy men toǵyz deńgeıli jerasty avtoturaǵyna baǵyttalǵan.
Behind every iconic skyline is relentless progress. Construction is in full motion at Burj Azizi, set to be the world’s 2nd tallest tower. 750 workers on-site daily, building the raft with precision, dedication, and the highest safety standards. The future of Dubai is taking shape. 🏗️ #AziziDevelopments #Azizi #BurjAzizi
— Azizi Developments (@AziziGroup) April 24, 2026
Býrdj-Azızı munarasynda turǵyn úıler, qonaqúı, saýda oryndary, meıramhanalar men sholý alańy ornalasady. Jobadaǵy bıiktigine jetse, ol Djıdda-Taýer men Býrdj-Halıfadan keıingi álemdegi úshinshi bıik ǵımarat atanbaq.
Qazirgi tańda álemdegi eń bıik ǵımarattar reıtınginde Kýala-Lýmpýrdaǵy bıiktigi 679 metrlik Merdeka-118 ekinshi, al Shanhaıdaǵy 632 metrlik munara úshinshi orynda tur.
Parsy shyǵanaǵy elderindegi eki jobanyń qurylysy aıaqtalyp, munaralar josparlanǵan bıiktikke jetse, Merdeka-118 men Shanhaı munarasy álemdegi eń bıik úsh ǵımarattyń qatarynan shyǵady.
Buǵan deıin Grýzııada eń bıik záýlim ǵımarattyń jobasy tanystyrylǵany habarlanǵan bolatyn.
