Álemdegi eń baı adamdardyń jartysy AQSh pen Qytaıda turady

ASTANA. KAZINFORM – Knight Frank táýelsiz konsaltıngtik kompanııasynyń bıylǵy jyly jarııalanǵan dáýlettilik týraly esebine sáıkes, 2023 jyly álemdegi asa baı adamdardyń sany 42 paıyzǵa ósip, 626,6 myń adamǵa jetken. Kompanııanyń boljamynsha, 2028 jyldyń sońyna qaraı olardyń sany taǵy 28,1 paıyzǵa artyp, 802,9 myń adamǵa jetedi. Bul týraly ranking.kz habarlaıdy.

Asa dáýletti adamdardyń kópshiligi Soltústik Amerıkada turady: 253,1 myń adam, bul - bir jyl burynǵy kórsetkishten 7,2%-ǵa kóp.

Azııa men Eýropada asa baı adamdardyń aıtarlyqtaı sany tirkeldi: sáıkesinshe 165,4 myń jáne 155,2 myń adam.

Odan keıingi orynda Taıaý Shyǵys (18,8 myń adam), Aýstralııa (17,9 myń adam), Ońtústik Amerıka (13,2 myń adam) jáne Afrıka (3 myń adam) tur. 

Elder boıynsha asa baı adamdardyń úshten birinen astamy 225,1 myń adam AQSh-ta turady.

Odan keıingi orynda Qytaı ornalasqan (98,6 myń adam). Bul eki elde álemdegi asa baı adamdardyń jartysynan astamy turyp jatyr. 

Asa dáýletti adamdar sany eń kóp bes eldiń qataryna Germanııa (29 myń adam), Kanada (27,9 myń adam) jáne Frantsııa (24,9 myń adam) kirdi.

Tutastaı alǵanda, alǵashqy 10 eldiń úlesine álemdegi asa baı adamdardyń 79,2%, al alǵashqy 20 eldiń 90% derlik úlesi bar.

Qazaqstan Knight Frank esebine kirmegenimen, Forbes World's Billionaires mıllıarderleriniń 2024 jylǵy jańartylǵan reıtınginde 6 qazaqstandyq álemdik mıllıarderler tizimine endi. 5,8 mlrd dollar baılyǵy bar Vıacheslav Kım alǵash ret Qazaqstannyń eń baı adamy atandy. Odan keıin tizimde Tımýr men Dınara Qulybaevtar (5 mlrd AQSh dollar), Vladımır Kım (3,6 mlrd AQSh dollary), Tımýr Týrlov (3,3 mlrd dollar) jáne Bolat Ótemuratov (2,7 mlrd dollar) esimderi tur.