Álemdegi eń aqyldy elder anyqtaldy

ASTANA. KAZINFORM – «World of Card Games» jýrnalynyń jańa zertteýi Nobel syılyǵyna nomınatsııalar, halyqtyń IQ deńgeıi jáne joǵary bilimge qol jetkizý sııaqty birqatar faktorlarǵa negizdelgen álemdegi eń aqyldy elder reıtıngin jasady, dep habarlaıdy Kazinform menshikti tilshisi.

Osylaısha, Shveıtsarııa reıtıngte eń aqyldy el retinde tanyldy. Ol 100 baldyń 92,02-sin jınady. Zertteýde Eýropanyń bul taýly elinde Nobel syılyǵyna 1099 úmitker bar ekeni, al halyqtyń ortasha IQ kórsetkishi 99,24 ekeni atap ótildi.

Sondaı-aq, Shveıtsarııadaǵy eresekterdiń 40,02%-y kem degende bakalavr dárejesine ıe. Bul barlyq elder arasyndaǵy eń joǵary kórsetkish. El turǵyndarynyń 18,05%-y magıstr nemese odan joǵary dáreje aldy.

Daily Mail jazýynsha, ekinshi orynda Ulybrıtanııa tur.

Tumandy Albıon elinde Nobel syılyǵyna 2393 úmitker bar, eresekterdiń tek 39,59%-y bakalavr dárejesine, al 14,37%-y kem degende magıstr dárejesine ıe. Brıtandyqtardyń ortasha IQ kórsetkishi – 99,12.

Úshinshi orynda 89,18 kórsetkishimen Amerıka Qurama Shtattary tur, bul joǵary bilim deńgeıin kórsetedi: eresekterdiń 38,57%-y bakalavr dárejesine, al 14,79%-y magıstr dárejesine ıe.

Sonymen qatar, AQSh-ta Nobel syılyǵyna usynylǵandar sany eń kóp – 5717 adam, bul taldanǵan barlyq elderdiń ishindegi eń joǵary kórsetkish.

Sonymen qatar, AQSh-ta Nobel syılyǵyna usynylǵan ýnıversıtetterdiń sany eń kóp – 256. Amerıkalyqtardyń ortasha IQ kórsetkishi – 97,43.

Nıderlandy jalpy 87,3 balmen tórtinshi oryn aldy. Ortasha IQ kórsetkishi 100,74 quraıdy, al el turǵyndarynyń 36,63%-y bakalavr dárejesin alǵan.

Belgııa 86,58 jáne ortasha IQ kórsetkishi 97,49 bolyp besinshi oryn aldy.

Osylaısha, World of Card Games nusqasy boıynsha eń aqyldy 10 el:

1. Shveıtsarııa 
2. Ulybrıtanııa 
3. Qurama Shtattar
4. Nıderland
5. Belgııa 
6. Shvetsııa 
7. Germanııa 
8. Polsha 
9. Danııa 
10. Fınlıandııa

Fınlıandııada IQ kórsetkishi eń joǵary – 101,20.

Osy arada Polshada magıstr nemese odan joǵary dárejesi bar turǵyndar kórsetkishi eń joǵary — eresek turǵyndardyń 22,31%-y.

World of Card Games negizin qalaýshy Holger Sındbek mundaı reıtıngter elderdiń bilim berý men zertteýge uzaq merzimdi ınvestıtsııalar arqyly aqyldy, qabiletti azamattardy tárbıeleý úshin qalaı jumys istep jatqanyn kórsetetinin atap ótti.

Onyń aıtýynsha, eń úzdik oryndaýshylar álemdik deńgeıdegi ýnıversıtetterden bastap kóbirek adamdardyń dıplom alýyn qamtamasyz etýge deıin bir ýaqytta birneshe salaǵa nazar aýdaryp otyr.

- Shveıtsarııanyń birinshi oryn alýy shaǵyn eldiń kólemge emes, sapaǵa basa nazar aýdarý arqyly úlken áser ete alatynyn tanytyp otyr. Eýropa elderiniń joǵary kórsetkishteri aımaqtar bilim berýge ınvestıtsııa salǵan kezde basymdyqtary barlyq elderge taralatynyn kórsetedi, - dep atap ótti Sındbek.

Degenmen, iriktemege Azııa, Soltústik jáne Ońtústik Amerıka, Aýstralııa jáne t.b. elderiniń ýnıversıtetteri nemese halyqtary kirmegenin eskersek, bul zertteý shartty sıpatqa ıe.

Aıta keteıik, Almatyda JI kómegimen «aqyldy qala» júıesi damytylyp jatyr.