Álemdegi dızel otynynyń qory sońǵy 35 jyldaǵy eń tómengi deńgeıge tústi
ASTANA. KAZINFORM — Taıaý Shyǵystaǵy qaqtyǵys saldarynan álemniń keıbir naryqtarynda dızel otynynyń qory sońǵy 35 jyldaǵy eń tómengi deńgeıge deıin qysqardy, dep habarlaıdy TASS.
Abý-Dabıdiń ulttyq munaı kompanııasynyń (ADNOC) bas dırektory Sultan ben Ahmed ál-Djaber ADIPEC 2026 halyqaralyq energetıkalyq konferentsııasynda Ormýz buǵazy arqyly keme qatynasynyń buzylýy energııa resýrstaryn jetkizýge aıtarlyqtaı kedergi keltirgenin málimdedi.
Onyń aıtýynsha, keıbir naryqtarda dızel otynynyń qory jyldyń osy kezeńindegi sońǵy 35 jyldaǵy eń tómengi kórsetkishke jetken. ADNOC basshysy ózge naryqtarda suıytylǵan tabıǵı gaz tapshylyǵy da baıqalyp otyrǵanyn aıtty.
Ormýz buǵazy arqyly keme qatynasy buzylǵaly beri álemdik munaı qorynan shamamen 1 mlrd barrel munaı paıdalanylǵan. Sonymen qatar shıkizatty tasymaldaý shyǵyndary aıtarlyqtaı ósken.
Iranmen qaqtyǵys bastalǵanǵa deıin munaıdyń bir barreliniń qunyndaǵy logıstıkalyq shyǵyndardyń úlesi shamamen 5% bolsa, qazir bul kórsetkish 30%-ǵa jetken.
Ormýz buǵazy — álemdegi energııa resýrstaryn tasymaldaýdyń mańyzdy baǵyttarynyń biri. Bul jol arqyly dúnıejúzilik munaı saýdasynyń shamamen 25%-y jáne suıytylǵan tabıǵı gaz saýdasynyń 20%-ǵa jýyǵy ótedi.
Eske salaıyq, 28 aqpanda AQSh pen Izraıl Iranǵa qarsy áskerı operatsııa bastady. Maýsymda Vashıngton men Tegeran Lıvan aýmaǵyndaǵy qaqtyǵystardy qosa alǵanda, áskerı is-qımyldy toqtatýdy kózdeıtin ózara túsinistik týraly memorandýmǵa qol qoıǵan.
Alaıda 8 shildege qaraǵan túni AQSh tarapy Iranǵa jappaı soqqy jasaýdy qaıta bastaǵanyn málimdedi. Vashıngton Tegerandy Ormýz buǵazyna qatysty kelisimderdi oryndamady dep aıyptady.
Keıin AQSh ákimshiligi aýqymdy áskerı áreketterden bas tartyp, Iranǵa sanktsııalar arqyly ekonomıkalyq qysymdy kúsheıtýge kóshetinin habarlady.
Aıta keteıik, Iran AQSh óz talaptaryn oryndaǵan jaǵdaıda Ormýz buǵazyn qaıta ashyp, dıplomatııalyq kelissózderdi eki kún ishinde jańǵyrtýǵa daıyn ekenin jetkizdi.
