Álemdegi asa baı adamdar sany aldaǵy jyldary 25%-ǵa artady
ASTANA.KAZINFORM — Álemde asa baı adamdardyń sany aldaǵy jyldary aıtarlyqtaı artady. Knight Frank agenttiginiń taldaýyna sáıkes, qazirgi tańda álemde 3110 mıllıarder bar. Aldaǵy bes jylda olardyń sany 25%-ǵa ósip, shamamen 4000-ǵa jetedi dep boljanyp otyr.
Zertteý derekterine qaraǵanda, mıllıarderler sany eń jyldam ósetin elderdiń biri – Saýd Arabııasy. Munda olardyń sany 2026 jylǵy 23-ten 2031 jyly 65-ke deıin artýy múmkin. Sondaı-aq Polsha men Shvetsııa elderinde de eki eseden astam ósim kútiledi.
Bul úrdis álemdegi baılar men kedeıler arasyndaǵy alshaqtyqtyń ulǵaıyp kele jatqan kezeńine tuspa-tus kelip otyr.
Qazirgi tańda mıllıarderlerdiń shamamen úshten biri Soltústik Amerıka aımaǵynda turady. Alaıda 2031 jylǵa qaraı bul kórsetkishti Azııa-Tynyq muhıty óńiri basyp ozady dep kútiledi. Sol ýaqytqa qaraı bul óńirge álemdegi mıllıarderlerdiń 37,5%-y tıesili bolady, al Soltústik Amerıkanyń úlesi 27,8% shamasynda qalady.
Sonymen qatar, baılyǵy keminde 30 mıllıon dollardy quraıtyn adamdar sany da kúrt artqan. 2021 jyly olardyń sany 162 myń bolsa, qazir 713 myńnan asty, ıaǵnı 300%-dan astam ósim tirkelgen.
Lıam Beılı aıtýynsha, bıznesti keńeıtý múmkindikteri buryn-sońdy bolmaǵan deńgeıge jetken. Bul tehnologııalar men jasandy ıntellektiniń damýynyń arqasynda iri kapıtaldardyń tez qalyptasýyna yqpal etip otyr.
Al Oxfam uıymynyń jyl saıynǵy esebine sáıkes, 2025 jyly álemde mıllıarderler sany alǵash ret 3000-nan asty. Olardyń jıyntyq baılyǵy 18,3 trıllıon dollardy quraıdy.
