Álemdegi ahýalǵa oraı el bıýdjeti qaıta qarala ma

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın munaı baǵasynyń ósýi el bıýdjetine qalaı áser etýi múmkindigine oraı pikir bildirdi.

Onyń aıtýynsha, qazirgi tańda respýblıkalyq bıýdjetti qaıta qaraýǵa negiz joq. Óıtkeni jahandyq úrdisterdi naqty boljaý múmkin emes.

— Nelikten ekenin túsinesizder me? Óıtkeni bul qandaı trendter ekeni jáne olardyń qanshalyqty turaqty bolatyny ázirge belgisiz. Bizdi qazir munaıdyń saýdalanyp jatqan baǵasynan góri gýmanıtarlyq jaǵy kóbirek alańdatady. Bul qaqtyǵys tezirek aıaqtalyp, taraptar beıbit kelisimge kelgenin qalaımyz. Sebebi Iran jáne EAEO-men erkin saýda rejımi týraly kelisimge qol qoıǵanbyz, saýda belsendi júrgizilip jatyr. Parsy shyǵanaǵyndaǵy barlyq elmen de saýda qarqyndy. Sondaı-aq Amerıka Qurama Shtattarymen de qarym-qatynasymyz jaqsy. Jyl saıynǵy taýar aınalymy shamamen 4 mlrd dollardy quraıdy, — dedi ol Májilistiń jalpy otyrysynan keıin.

Vıtse-premerdiń atap ótýinshe, Qazaqstan bul elderdegi jaǵdaıdyń turaqty ári boljamdy bolǵanyna múddeli.

Buǵan deıin Taıaý Shyǵystaǵy ahýalǵa baılanysty qansha otandasymyz elge oralǵanyn jazǵan edik.