Álemde jyl saıyn mıllıonǵa tarta adam ózine ózi qol salady - Konferentsııa

ASTANA. 14 mamyr. QazAqparat - Búgin Astanada «Sýıtsıdterdiń aldyn-alýdyń memlekettik deńgeıdegi vedomstvoaralyq aspektileri» taqyrybynda halyqaralyq konferentsııa óz jumysyn bastady. Sharany QR Densaýlyq saqtaý mınıstrligi BUU Balalar qory uıymymen birlesip uıymdastyryp otyr.

Densaýlyq saqtaý mınıstrliginiń taratqan málimetterine qaraǵanda, álemde jyl saıyn 1 mıllıonǵa tarta adam sýıtsıdke bel býady. Sondyqtan da, sarapshylar adamdardyń óz-ózine qol salýyn ǵalamdyq aýqymdaǵy psıhıkalyq másele retinde qarastyryp otyr. Osyny eskergen Shvetsııa, Norvegııa, Fınlıandııa, Danııa, Germanııa, Frantsııa, Ulybrıtanııa, Avstralııa, AQSh sekildi elderde sýıtsıdtiń aldyn-alýǵa baǵyttalǵan baǵdarlamalar memlekettik deńgeıde qabyldanǵan.

Konferentsııada álemde jáne Qazaqstanda balalar men jastar arasyndaǵy sýıtsıdtik minez-qulyq máselelerine sholý jasaý, onyń aldyn-alý boıynsha tıimdi jáne ǵylymı negizdelgen halyqaralyq tájirıbelerdi zertteý, Qazaqstanda derttiń aldyn-alý jáne monıtorıngileýdiń tıimdi strategııasyn ázirleý máseleleri talqylanatyn bolady. Jalpy, mamandar ózara is-qımyldyń tıimdi tetikterin ázirlep, ol boıynsha memlekettik organdar men úkimettik emes qurylymdardyń birlese áreket etýiniń mańyzyn joǵary baǵalaıdy.

Halyqaralyq konferentsııa jumysyna QR Parlamenti depýtattary, múddeli memlekettik organdar, oblystar, Astana jáne Almaty qalalary ákimdikteriniń ókilderi, elshilikterdiń, halyqaralyq jáne úkimettik emes uıymdardyń mamandary qatysýda.