Álemde jyl saıyn 1,3 mıllıon adam jol apatynan qaza bolady
ASTANA. QazAqparat - Jyl saıyn 1,3 mıllıon adam kólik apatynan kóz jumady. Qurban bolǵandardyń teń jarymy - jaıaý jol júrginshileri, velosıpedshiler men baıkerler. Bul málimet BUU-nyń qorshaǵan orta jónindegi jańa baıandamasynda jarııa etildi, dep habarlaıdy «Habar 24».
Sarapshylardyń aıtýynsha, qalalar ınfraqurylymyn durys damytsa, mıllıondaǵan adamdy ajaldan arashalap qalýǵa bolady. Baıandamanyń pikirinshe, qala salýshylar jaıaý jáne velosıpedpen serýendeıtin arnaıy aımaqtar qurýǵa mán berýi tıis. Bul qorshaǵan ortanyń saqtalýyna da septigin tıgizedi.
BUU-nyń málimetine júginsek, aýany lastaıtyn zııandy zattardyń 23 paıyzy avtokólikter úlesine tıedi. AQSh, Gollandııa men Shvetsııada Afrıka elderine qaraǵanda jol apaty sırek bolady. Mysaly, Malıde jaıaý júrginshiler men velosıpedshiler qurbandardyń 66 paıyzyn quraıdy. Uıym ókilderiniń paıymdaýynsha, qaýipsiz joldardyń ashylýyn kózdeıtin jobalardyń qarjylandyrýy artsa, halyqtyń densaýlyǵy jaqsaryp, aýany lastaıtyn zııandy zattar úlesi de azaıar edi.
