Álemde júz myńnan astam dáriger koronavırýstan kóz jumdy

MÁSKEÝ. QazAqparat – Dúnıejúzilik densaýlyq saqtaý uıymynyń qazan aıyndaǵy esebine sáıkes, álemde kem degende 115 myń medıtsına qyzmetkeri koronavırýstan qaıtys bolǵan, dep habarlaıdy QazAqparat tilshisi.

«2020 jyldyń qańtarynan 2021 jyldyń mamyryna deıingi aralyqta 80-nen 180 myńǵa deıin dáriger COVID -19 ınfektsııasynan qaıtys bolýy múmkin. Demek, qazirgi ýaqytta ortasha eseppen bul kórsetkish 115 500-nan asady», - delingen uıym saıtynda jarııalanǵan málimette.

Reseıde medıtsına qyzmetkerleriniń koronavırýstan bolǵan ólimi týraly ashyq resmı statıstıka joq. Sońǵy ret ótken jyldyń qyrkúıeginde Reseı Federatsııasynyń Densaýlyq saqtaý mınıstrligi vırýs juqtyrǵan 258 dárigerdiń qaıtys bolǵanyn habarlaǵan edi.

Osy rette, halyqtyń qaıtys bolǵan aq halattylar týraly derekterdi derbes engizýine múmkindik beretin birqatar táýelsiz ınternet-jobalar bar. Sonyń biri – «Este qalar tizimde» búginde 1459 adamnyń aty-jóni jazylǵan.

Bıylǵy 17 qyrkúıekte Máskeýdegi Sechenov ýnıversıtetiniń aýmaǵyndaǵy Ómir alleıasynda indetke qarsy kúresken medıtsına qyzmetkerleriniń erligine arnalǵan monýmenttiń ashylýy kóz jumǵan qaharmandardy eske alýǵa arnalǵan sımvoldyq sharalardyń biri boldy.

Narynbek Ysmaǵulov