Álemde jýrnalıstıkaǵa A. Baıtursynulynan asyryp anyqtama bergen adam joq - N. Omashev
ASTANA. 11 jeltoqsan. QazAqparat - Men qansha elderdiń jýrnalıstıkasyn zerttedim, sonda bir ǵana anyqtamadan asyryp aıtylǵan anyqtama kezdestirgen emespin. Ol Ahmet Baıtursynulynyń «Gazet - halyqtyń kózi, qulaǵy hám tili» degen sózi. Kez kelgen jýrnalıstiń qyzmeti - halyqtyń kózi, qulaǵy hám tili bola bilý.
Bul týraly búgin L. N. Gýmılev atyndaǵy Eýrazııa ulttyq ýnıversıtetinde «Qazaqstan jýrnalısteriniń etıkalyq kodeksin» talqylap, stýdentterge túsindirýge arnalǵan semınarda fılologııa ǵylymdarynyń doktory, professor Namazaly Omashev aıtty.
Onyń aıtýynsha, bıliktiń bolsyn, oppozıtsııanyń bolsyn qaramaǵynda qyzmet atqaratyn kez kelgen jýrnalıst óziniń osy bir negizgi qyzmetin esh ýaqytta esinen shyǵarýǵa bolmaıdy. Al ony esten shyǵarmaýǵa kómektesetin birden-bir qural - ol ishki jan-dúnıe men ar-ojdan. «Mine, bıyl ǵana Qazaqstan jýrnalıster odaǵy men Bas redaktorlar klýby birlesip qabyldaǵan «Qazaqstan jýrnalısteriniń etıkalyq kodeksi» jas jýrnalısterdi óziniń ar-ojdanynan attap ketpeı, halqynyń aldyndaǵy qyzmetin abyroımen atqarýǵa shaqyrady. Tipti, qanshama jyl jýrnalıstik qyzmet atqaryp kelgen aǵa býyn ókilderi de kodekstiń tekstin gazetten qıyp alyp, ústeliniń ústine, kóziniń aldyna qoıyp qoıady. Sondyqtan, búginde ýnıversıtet qabyrǵasynda osy qujattyń baptaryn kúnde talqylap-taldap jatsaq ta, odan tek qana úlgi-ónege men aqyl-keńes alamyz dep oılaımyn», - dep atap ótti ol.
Otyrysqa Jýrnalıstıka jáne saıasattaný fakýltetiniń dekany Qaırat Saq, Bas redaktorlar klýbynyń prezıdenti Kenjebolat Joldybaı, ýnıversıtet professorlary men oqytýshylary jáne stýdentter qatysty.
