Álemde jyl saıyn 18 mln adam júrek-qan tamyrlary aýrýlarynan kóz jumady
Búgin – Dúnıejúzilik júrek kúni. Álemde jyl saıyn 18 mıllıonnan asa adam júrek-qan tamyr aýrýlarynan kóz jumady. Mundaı statıstıkany Kardıologııa jáne ishki aýrýlar ǵylymı-zertteý ınstıtýtynyń kardıology Botagóz Qystaýova keltirdi, dep habarlaıdy QazAqparat tilshisi.
Kardıologııa jáne ishki aýrýlar ǵylymı-zertteý ınstıtýtynyń konsýltatsııalyq-dıagnostıkalyq ortalyǵynyń kardıology, joǵary sanatty dáriger, medıtsına ǵylymdarynyń kandıdaty Botagóz Qystaýovanyń aıtýynsha, bıyl dúnıejúzilik júrek kúniniń urany «Júrek – ómir súrýge arnalǵan».
Bul kúndi ótkizýdiń maqsaty – qoǵamnyń nazaryn densaýlyqty saqtaý máselelerine aýdarý, júrek-qan tamyrlary aýrýlarynyń aldyn alýdyń mańyzdylyǵyn atap ótý.
«Jyl saıyn álemde 18 mıllıonnan astam adam júrek-qan tamyrlary aýrýlarynan qaıtys bolady. Aǵzalardyń, organızm júıeleriniń jaǵdaıy jáne adamnyń ómir súrý uzaqtyǵy júrektiń jáne búkil júrek-qantamyrlary júıesiniń durys jumys isteýine baılanysty. Júrek-qan tamyrlary aýrýlarynyń aldyn alý densaýlyq pen uzaq ómir súrýdi qamtamasyz etýde sheshýshi ról atqarady», - deıdi dáriger.
Kardıologtyń aıtýynsha, júrek aýrýymen qazir balalar men jastar da jıi aýyratyn bolǵan.
«Dıspanserlik aýrýlardyń elektrondyq regıstri» aqparattyq júesiniń málimetterine júginsek, elimizde qan aınalymy júıesiniń aýrýlary boıynsha – 1 760 744 patsıent dıspanserlik esepke alynǵan, onyń 5914-i bala. Al, arterıaldyq gıpertonııaǵa 1 628 155 adam shaldyqqan. Onyń 817 -i bala»,- deıdi ol.
Mamannyń sózinshe, adamdardyń júrek aýrýyna shaldyǵýyna birneshe faktor áser etedi. Eń birinshisi – ómir saltynyń ózgerýi. Sosyn fızıkalyq qozǵalystyń azaıýy, zııandy tamaqtaný, qant pen tuzdy shekten tys qoldaný kóp áser etedi.
«Sondyqtan, maı, tuz jáne qantty shekteıtin teńdestirilgen ratsıondy ustaný kerek. Kókónis, jemis-jıdek jáne quramynda magnıı bar taǵamdardy kóbirek tutynǵan abzal. Turaqty jattyǵýlar júrek pen qan tamyrlaryn nyǵaıtady. Qalypty salmaqty saqtaǵan jón. Temeki shegýden jáne alkogoldi ishimdik ishýden bas tartý kerek – temeki shegý jáne shamadan tys ishimdik ishý júrek pen qan tamyrlary aýrýlarynyń qaýpin arttyrady»,- deıdi dáriger.