Álemde velosıpedshiler úshin eń qolaıly 10 qala
ASTANA. QazAqparat – Dúnıejúzinde el úkimetteri kómirqyshqyl gazy qaldyǵyn azaıtýǵa tyrysyp jatyr, al qalalar adamdardyń avtokólikten túsip, velosıpedke aýysýyna qolaıly bola bastady. Global Bicycle Cities Index-tiń keıingi zertteýi velosıped ınfaqurylymy damyǵan elderdiń kóbi Eýropada ekenin anyqtady, dep habarlaıdy QazAqparat.
Álem boıynsha 90 qala alty parametr boıynsha taldandy.
Olar: velosıped sany, aýa raıy, qylmys pen qaýipsizdik dárejesi (mysaly, kólik apaty men velosıped urlaý), ınfraqurylym sapasy, velokólik jalǵa alý men arnaıy is-sharalar, máselen, avtokóliksiz kúnder qanshalyqty jıi bolyp turatyny eskerildi.
Eýropa qalalarynyń velojoly jaqsy jáne velosıped aıdaýǵa bolatyn bir jyldaǵy aýa raıy qolaıly kún kóp bolǵandyqtan Eýropa qalalary kósh bastady.
Qurama Shtattardyń bir de bir qalasy top-20 qataryna enbegen.
Tek San-Frantsısko (39-oryn), Portlend (41), Sıetl (50), Vashıngton (53), Los-Andjeles (57), Boston (61 – bir qyzyǵy, ol Londonnan bir orynǵa ǵana alda bolady), Nıý-Iork (67), Chıkago (71) jáne Detroıt (72) top-90 qatarynda bar.
Velosıped aıdaıtyndarǵa qolaıly úzdik 10 qala:
1. Ýtreht, Nıderlandy
2. Mıýnster, Germanııa
3. Antverpen, Belgııa
4. Kopengagen, Danııa
5. Amsterdam, Nıderlandy
6. Malme, Shvetsııa
7. Hanchjoý, Qytaı
8. Bern, Shveıtsarııa
9. Bremen, Germanııa
10. Gannover, Germanııa
Brıtan qalalary ishinde eń jaqsy kórsetkishke ıe – Brıstol qalasy. Ol velosıped urlyǵyna qatysty qylmys sany az ári velojol jelisi jaqsy jasalǵandyqtan 15-oryn aldy.
Al Frantsııa top-10 qataryna ilikpegenimen, Strasbýrg – 11 orynǵa, Bordo – 12 orynǵa ıe boldy.
