Álemde tuńǵysh jasandy ıntellekt-mınıstr Albanııada taǵaıyndaldy

ASTANA. KAZINFORM — Albanııada memlekettik satyp alýlardy qadaǵalaıtyn jasandy ıntellekt-mınıstr qyzmetke kiristi. Ol Diella dep atalady (alban tilinde «kún» degen maǵynany bildiredi). Bul týraly eldiń premer-mınıstri Edı Rama málim etti, dep habarlaıdy Politico.

Ramanyń aıtýynsha, memlekettik tenderler boıynsha sheshimder kezeń-kezeńimen mınıstrlikterden Diella-nyń quzyryna beriledi.

«Nátıjesinde Albanııa memlekettik tenderleri 100% sybaılas jemqorlyqtan arylǵan elge aınalady. Barlyq memlekettik qarajat ashyq ári tolyqtaı baqylaýda bolady. Bul — ǵylymı fantastıka emes», — dedi premer.

Jasandy ıntellekt Diella-ny alban halqy jaqsy tanıdy. Ol qazirdiń ózinde ulttyq elektrondy memlekettik qyzmetter júıesi — e-Albania-ny basqaryp otyr.

Jasandy ıntellekttiń avatarynda dástúrli alban kıimindegi jas qyz beınelengen.

Aıta keteıik, Albanııanyń burynǵy prezıdenti sybaılas jemqorlyqqa qatysy bar degen kúdikpen qamaýǵa alynǵanyn jazǵanbyz.