Álemde tolyǵymen kún energııasyna kóshken alǵashqy aımaq paıda boldy
ASTANA. 8 qarasha. QazAqparat -Tynyq muhıtynda Jańa Zelandııanyń Tokelaý araldary óziniń energetıkalyq qajettilikterin kún qýaty esebinen qamtamasyz etetin alǵashqy aımaq atanyp otyr, dep habarlaıdy Bı-bı-sı.
Buǵan deıin araldar dızeldi elektr stansasynyń kómegimen energııa alyp kelgen, ol úshin janar-jaǵar maı satyp alýǵa jylyna 1 mln dollar qarajat jumsalǵan. Endi 4 myńnan astam kún batareıalary iske qosylǵannan keıin suıyq otyn satyp alýdyń qajeti bolmaı qaldy. Joba 8,5 mln dollarǵa shyqqan, sonyń 7 mln. dollaryn Jańa Zelandııa úkimeti óz moınyna alǵan.
Tokelaý araldarynda 1,5 myńǵa jýyq adam turady. Aldaǵy jyldary Tynyq muhıty aımaǵynda taǵy birneshe aral energııanyń osyndaı túrlerin paıdalanýǵa kóshýdi josparlap otyr.
