Álemde tez taralatyn óte qaýipti juqpaly aýrýlardyń epıdemııasy baıqalyp otyr – Lýkın
ASTANA. KAZINFORM – Senatta bıologııalyq qaýipsizdiktiń qazirgi jaǵdaıy men bolashaǵy talqylandy.
Senattyń Halyqaralyq qatynastar, qorǵanys jáne qaýipsizdik komıtetiniń depýtattary bıologııalyq qaýipsizdik máseleleri boıynsha otyrys ótkizdi. Qatysýshylar osy saladaǵy ózekti syn-qaterlerdi, onyń ishinde ınfektsııalardyń taralý qaýpi, baqylaý júıesin jetildirý jáne memlekettik organdardyń yntymaqtastyǵyn úılestirý máselelerin talqylady. Zerthanalardy jańǵyrtý, maman daıarlaý jáne organdar arasyndaǵy ózara is-qımyldy damytýǵa basa nazar aýdaryldy.
Komıtet tóraǵasy Andreı Lýkın otyrys basynda bıologııalyq qaýipsizdik halyqtyń densaýlyǵy men elimizdiń ekonomıkalyq ál-aýqatyna tikeleı áser etetinin atap ótti. Ol baqylaý júıesin jańǵyrtý, zańnamany jetildirý jáne memlekettik organdar arasyndaǵy yntymaqtastyqty nyǵaıtý qajettigine toqtaldy.
- Bıologııalyq qaýipsizdik álem qaýymdastyǵyna mańyzdy másele bolyp otyr, ol elimiz halqynyń ekonomıkasy men áleýmettik ál-aýqatyna da tikeleı áser etedi. Sońǵy jyldary álemdik keńistikte tez taralatyn, halyqtyń densaýlyǵy men el ekonomıkasyna zııan keltiretin óte qaýipti juqpaly aýrýlardyń epıdemııasy baıqalýda. Sonymen qatar qazirgi jaǵdaıda terrorıstik toptar tarapynan bıologııalyq qarýdy qoldaný qaýpi men halyqaralyq kólik dálizderi arqyly erekshe qaýipti ınfektsııanyń kelý qaýpi bar. Osy máselelerdi quzyretti organdarymyz turaqty baqylaýda ustaýy tıis, – dedi Andreı Lýkın.
Qorǵanys mınıstrliginiń birinshi orynbasary Sultan Qamaletdınov otyrys barysynda elimizdiń Qarýly Kúshterinde bıologııalyq qaýipsizdikti qamtamasyz etý sharalar aıasynda bıologııalyq qaýipterdi basqarý ádistemesi men 2024–2025 jyldarǵa arnalǵan tıisti jospardy ázirlengeni týraly aıtty. Densaýlyq saqtaý mınıstriniń birinshi orynbasary Tımýr Sultanǵazıev otandyq vaktsınalar óndirisin arttyrý, zamanaýı tehnologııany engizý jáne erekshe qaýipti ınfektsııalarǵa qatysty ǵylymı jobalardy júzege asyrý qajettigine toqtaldy.
Otyrysqa qatysýshylar bıologııalyq qaýipsizdik júıesin odan ári jetildirý, memlekettik organdar arasyndaǵy yntymaqtastyqty kúsheıtý jáne yqtımal bıologııalyq qaýipterge daıyndyqty arttyrýdyń mańyzdylyǵyna nazar aýdardy. Otandyq vaktsına óndirisin damytý, zerthanalardy jańǵyrtý jáne bilikti mamandar daıarlaý negizgi basymdyqtar qataryna jatatyny aıtyldy.
Jarqanattan juǵatyn jańa koronavırýs týraly resmı aqparat joq ekeni týraly jazǵan edik.