Álemde sońǵy 20 jyl ishinde 5 jasqa deıingi semiz balalardyń sany 1,5 esege artqan
ALMATY. QazAqparat - Sońǵy 20 jyl ishinde álemde 5 jasqa deıingi balalar arasynda artyq salmaǵy bar nemese semiz balalardyń sany bir jarym esege artyp, 44 mıllıonǵa jetken. Bul týraly Búkilálemdik densaýlyq saqtaý uıymy habarlady.
Uıymnyń sarapshylary bala kezdegi artyq salmaqtyń keıin eresek ómirde sýsamyr, qaterli isik, júrek-qan tamyrlary aýrýy sııaqty kóptegen aýrýlarǵa ákep soqtyratyndyǵyn atap kórsetti.
Búkil álemdik densaýlyq saqtaý uıymynyń Bas dırektory Margaret Chen osy máseleni sheshý maqsatynda balalar semizdigin joıýǵa baılanysty joǵary dárejeli komıssııa qurdy. Bul komıssııa endi osy bir jaǵymsyz qubylysqa qarsy tıimdi sharalar usynatyn bolady.
Sonymen qatar, komıssııaǵa ár túrli aımaqtarǵa qandaı tásildemeler men medıko-sanıtarlyq sharalardyń tıimdi bolatyndyǵy týraly baıandama jasaý tapsyryldy.
Komıssııa otyrysy osy aptada Jeneva qalasynda ótedi.
