Álemde porttarǵa arnalǵan alǵashqy avtonomdy sýtegi elektr stantsııasy synaqtan ótti
ASTANA. KAZINFORM — Brıtandyq konsortsıým jaǵalaýda elektr jelisine qosylmaı-aq kemelerdi aılaqta tikeleı qýattandyrýǵa qabiletti álemdegi alǵashqy qalqymaly energetıkalyq platformalardyń biri — Hydrogen Power Hub-ty tanystyrdy, dep habarlaıdy IOM3 kásibı ınstıtýty.
Jobany ELIRE Maritime kompanııasy Ricardo UK, Schneider Electric jáne ózge seriktestermen birlesip ázirledi.
Keshen jalpy aýmaǵy shamamen 1200 sharshy metrdi quraıtyn altyburyshty úsh modýldik platformadan turady. Onyń quramyna syıymdylyǵy 45 MVt·saǵ akkýmýlıatorlar, otyn elementteri, sýtek generatorlary jáne kún panelderi kiredi. Júıe úzdiksiz 5 MVt-qa deıin qýat óndire alady. Bul orta sanattaǵy krýızdik laınerler men basqa da iri kemelerdi aılaqta turǵan kezde elektr energııasymen qamtamasyz etýge jetkilikti.
Qondyrǵy bir apta ishinde shamamen 91 MVt·saǵ elektr energııasyn óndirip, oǵan 7,5–8 tonna sýtek jumsaıdy. Otyn ISO standartyna saı 7 konteınerde saqtalady, al qordy aptasyna eki ret tolyqtyrý qajet.
Joba avtorlary bul tehnologııa porttardy kómirteksizdendirýdegi negizgi máselelerdiń biri — elektr jelisi ınfraqurylymynyń jetkiliksizdigin sheshýge múmkindik beredi dep esepteıdi. Dástúrli jaǵalaýlyq elektrmen jabdyqtaý júıelerin qurý úshin qosalqy stantsııalardy jańǵyrtý, kabel jelilerin tartý jáne kóptegen kelisim rásimderinen ótý qajet. Al júzbeli energoortalyq mundaı shekteýlerdi aınalyp ótip, júıeni áldeqaıda jyldam iske qosýǵa múmkindik beredi.
Konsortsıým men Ricardo UK mamandarynyń baǵalaýynsha, bul platformany paıdalaný kemeler aılaqta turǵan kezde dızeldik generatorlarmen salystyrǵanda zııandy shyǵaryndylardy shamamen 77%-ǵa azaıtady. Bul kórsetkish sýtekti óndirý, tasymaldaý jáne saqtaý shyǵyndaryn esepke alǵannyń ózinde saqtalady.
Eske salaıyq, Qytaı Qyrǵyzstannyń jańa energııa kózderine 1 mlrd dollarǵa deıin ınvestıtsııa salýǵa daıyn.
