Álemde óte sırek kezdesetin qandaı baǵaly metaldar elimizde óndiriledi
Elimizde óndiriletin tıtandy «Boeing», «Airbus», «Nippon Steel», «SNECMA», «General Electric» kompanııalary qoldanady. Bul týraly Ónerkásip jáne qurylys mınıstrliginen málim etti, dep habarlaıdy Kazinform.
«Búgingi tańda Qazaqstanda sırek metaldar „Úlbi metallýrgııa zaýyty“ AQ (berıllıı, tantal, nıobıı), „Óskemen tıtan-magnıı kombınaty“ AQ (tıtan), „Jezqazǵansırekmet“ RMK-inde (ammonıı perrenaty), sonymen qatar negizgi metaldardyń iri óndiristeri negizinde ilespe ónim retinde „Kaztsınk“ JShS (selen, vısmýt), „Qazaqmys Smeltıng“ JShS (mys tellýrıdi), „Qazaqmys Progress“ JShS-inde (baıytylǵan selen) óndiriledi. Atap aıtqanda, „Úlbi metallýrgııa zaýyty“ AQ kvazımemlekettik „Samuryq-Qazyna“ UÁQ» AQ enshiles kompanııasy jáne álemdegi tolyq tsıkldi 3 berıllıı óndirýshi, 4 tantal men nıobıı óndirýshi kásiporyndardyń biri sanalady. «Óskemen tıtan-magnıı kombınaty» AQ tıtan gýbkasyn, quımalar men slıabtardy shyǵarady, tıtan qorytpalary men vanadıı pentaoksıdin shyǵarýǵa arnalǵan qýaty bar. Tıtan ónimderi sheteldik tutynýshylarǵa («Boeing», «Airbus», «Nippon Steel», «SNECMA», «General Electric») jetkiziledi», — delingen mınıstrliktiń agenttik saýalyna bergen jaýabynda.
Vedomstvonyń atap ótýinshe, «Jezqazǵansırekmet» RMK «Qazaqmys korporatsııasy» JShS mys balqytý zaýytynyń qaldyqtarynan 69,2 paıyz renıı bar ammonıı perrenatyn shyǵarady.
Ol sheteldik tutynýshylarǵa jóneltiledi.
Qazirgi ýaqytta kásiporyn renııdiń álemdik óndirýshileriniń ondyǵyna kiredi.
«Qazmyrysh» JShS kompanııanyń negizgi ónimderiniń qataryna jatpaıtyn óreskel selen men vısmýt óndiredi jáne eksporttaıdy.
Selen men vısmýt qorǵasyn zaýytynda quramynda qorǵasyn bar shıkizatty óńdeý nátıjesinde alynady.
«Qazaqmys Smeltıng» JShS eksportqa Balqash mys balqytý zaýytynyń shlamdarynan tellýr óndiredi.
Osy kompanııa Balqash mys balqytý zaýytynyń baǵaly metaldar óndirisiniń úıindi qojdarynan óreskel selen shyǵarý boıynsha qazaqstandyq ınnovatsııalyq tehnologııany engizdi.
«Qazaqstan alıýmınııi» AQ glınozem zaýytynyń alıýmınıı eritindisinen gallıı alýǵa arnalǵan qýaty bar.
«Gallıı — kompanııanyń negizgi ónimi emes. Gallıı shyǵarý ýchaskesi 2015 jyly tómen rentabeldilikke baılanysty saqtaldy. Ár sırek metal óndirýshi kásiporyn shıkizat kózderimen, tehnologııalyq alý joldarymen, qyzmet baǵyttarymen erekshelenedi. Sondyqtan salany monopolııalandyrý máselesin qozǵaý orynsyz dep paıymdaımyz», — dep atap ótedi mınıstrlikten.
