Álemde munaıdyń kommertsııalyq qory nebári birneshe aptaǵa jetedi – HEA
ASTANA. KAZINFORM – Halyqaralyq energetıka agenttiginiń (HEA) basshysy Fatıh Bırol dúısenbi kúni kommertsııalyq munaı qory tez taýsylyp jatqanyn jáne Taıaý Shyǵystaǵy qaqtyǵys pen Ormýz buǵazynyń jabylýyna baılanysty birneshe aptaǵa ǵana jetetinin málimdedi, dep habarlaıdy Reuters.
HEA basshysynyń málimdeýinshe, AQSh pen Izraıldiń Iranǵa shabýyldaryna deıin, aqpan aıynyń sońynda munaı naryqtarynda munaıdyń artylýy baıqalǵan, al kommertsııalyq qor óte joǵary bolǵan. Alaıda soǵysqa baılanysty jaǵdaı tez ózgerdi.
«Úlken jetiliktiń» qarjy naryqtary kóshbasshylarynyń Parıjdegi kezdesýine qatysyp otyrǵan Bırol tilshilerge munaıdyń strategııalyq qorynyń bosatylýy naryqqa táýligine 2,5 mln barrel munaı qosqanyn málimdedi, biraq bul qordyń «sheksiz emes» ekenin qosyp ótti.
Ol sondaı-aq saıahat jáne egistik maýsymynyń bastalýymen tyńaıtqyshtar men dızel otyny baǵasynyń ósip kele jatqanyn atap ótti.
Onyń aıtýynsha, bul azyq-túlik baǵasyna aıtarlyqtaı áser etýi jáne energııa tasymaldaýshylary baǵalarynyń ósýimen birge ınflıatsııa kórsetkishterin aıtarlyqtaı arttyrýy múmkin.
HEA munaı naryǵynyń jaǵdaıy týraly sońǵy aılyq esebine sáıkes, naýryz jáne sáýir aılarynda álemdik munaı qory rekordtyq qarqynmen qysqaryp, 246 mln barrelge azaıdy.
Agenttiktiń baǵalaýynsha, Taıaý Shyǵystaǵy soǵysqa baılanysty 2026 jyly álemdik munaı qory táýligine shamamen 3,9 mln barrelge qysqarady. Osylaısha, táýligine 1,5 mln barrelge azaıýdy shamalaǵan boljam aldyńǵy baǵalaýmen salystyrǵanda aıtarlyqtaı nasharlady.
- Álemdik munaı naryǵy úzilister saldaryn jumsartatyn daǵdarysqa deıingi artyqshylyqty eskergen jaǵdaıda da 2026 jyldyń tórtinshi toqsanyna deıin kúrdeli tapshylyq jaǵdaıynda qalýy múmkin. Naryqtar bir jyl ishinde qalpyna kelse de, taýsylǵan qorlardy qalpyna keltirý 2026 jyldan keıin de usynys tapshylyǵyn saqtaýy múmkin, - delingen agenttiktiń málimdemesinde.
Ótken aptada Halyqaralyq energetıkalyq agenttik Ormýz buǵazy arqyly jetkizilimdegi irkilister munaı naryǵyndaǵy tapshylyqty saqtap otyrǵanyn jáne baǵanyń kúrt qubylý qaýpin kúsheıtip jatqanyn eskertti.
Qazaqstan munaı óńdeý qýatyn eki esege arttyrýdy josparlap otyrǵanyn jazdyq.
