Álemde munaı óndirý men óńdeý úshin jylyna 700 mln dollar ınvestıtsııa qajet – OPEK bas hatshysy
ASTANA. KAZINFORM — Álemde munaı óndirý, óńdeý jáne tasymaldaý úshin jyl saıyn shamamen 700 mln dollar ınvestıtsııa qajet. Bul týraly Kazakhstan Energy Week — 2025 jáne XVI Eýrazııalyq KAZENERGY forýmynda OPEK bas hatshysy Haıtam al-Gaıs aıtty.
— Keıbireýler OPEK pen OPEK+ qabyldaıtyn sheshimder qysqa merzimdi keleshekke baǵyttalǵan dep oılaýy múmkin. Biraq bul olaı emes. Biz barlyq kókjıekke, alys bolashaqqa kóz salamyz. Nelikten ekenin de túsindire keteıin. Biz bolashaq ósim, bolashaq ınvestıtsııalar men bolashaq munaı óndirisi úshin platforma bolǵanyn qalaımyz. Munyń qanshalyqty qundy ekenin baǵalamaýym múmkin emes. Álemde jyldan jylǵa munaı tutyný kólemi arttyp keledi. Ótken jyly-aq gaz, kómir, munaı jáne jańartylatyn energııa kózderin tutyný rekordtyq kórsetkishke jetti. Álemge barynsha mol energetıka, energııa tasymaldaýshylar kerek, — dedi ol.
Onyń atap ótýinshe, 2050 jylǵa qaraı jer shary turǵyndarynyń sany 10 mlrd adamǵa jetedi. Sondyqtan jahandyq ekonomıka da sol kezeńde eselene túsýi qajet. Derekter ortalyǵy, jasandy ıntellekt syndy energııa tutynatyn jańa salalardyń damýy, sondaı jyldam ýrbanızatsııa úshin energııa óte mańyzdy.
— Álemde mlrd-taǵan adam energııa tasymaldaýshylarǵa qol jetkize almaı otyrǵanyn este saqtaýymyz qajet. Halyqaralyq qoǵamdastyq, tym bolmaǵanda negizgi energııa tasymaldaýshylar adamdarda tamaq daıyndaýǵa, jaryq qosýǵa, balalaryn mektepke aparýǵa nemese jumysqa barýǵa múmkindigi bolýy tıis ekenin túsinýi ári qamtamasyz etýi kerek. Bul barlyq energııa tasymaldaýshylardan úlken ınvestıtsııany talap etedi, — dedi OPEK bas hatshysy.
Osy oraıda ol OPEK-tiń 2025 jylǵa arnalǵan munaı naryǵyna sholýy jarııalanǵanyn aıtty.
— Sol sholýdan 2050 jylǵa deıin 2,3 trln dollar ınvestıtsııa qajet ekenin kórdik. Bul, munaı óndirý, óńdeý jáne tasymaldaý úshin jyl saıyn shamamen 700 mln dollar ınvestıtsııa qajet ekenin kórsetti. Ókinishke oraı álemde munaı-gaz jobalary ınvestıtsııa qajet etpeıdi dep sanaıtyndarǵa óte qarapaıym úsh sóz arnaǵym keledi. Sizder qatelesip otyrsyzdar, — dedi Haıtam al-Gaıs.
Aıta keteıik, Memleket basshysy Qasym-Jomart Toqaev Kazakhstan Energy Week — 2025 jáne XVI Eýrazııalyq KAZENERGY forýmy qatysýshylary men qonaqtaryna arnaıy úndeý joldaǵan edi.