Álemde mıllıonerler sany aıtarlyqtaı azaıdy
ASTANA. QazAqparat - Ótken jyly búkil álem boıynsha mıllıonerler sany azaıdy, dep habarlaıdy QazAqparat DW agenttigine silteme jasap.
2022 jyly múlikti esepke almaǵanda dáýleti mıllıon dollardan asatyn shamamen 21,7 mln adam tirkelgen.
Bul ótken jylmen salystyrǵanda 3,3 paıyzǵa az, dep habarlady Capgemini frantsýz konsaltıng fırmasy.
Jer betindegi eń baı adamdardyń jıyntyq múlki 3,6 paıyzǵa azaıyp, 83 trln dollardy quraǵan.
«Bul on jylda makroekonomıkalyq jáne geosaıası belgisizdikten týyndaǵan eń úlken qysqarý», - dep atap ótti Capgemini.
Kompanııanyń qarjy sarapshylary 71 eldegi múliktik jaǵdaıdy taldady.
Kompanııanyń málimetinshe, múliktiń eń kóp sany – 7,4 paıyz Soltústik Amerıkada qysqarǵan.
Eýropada mınýs 3,2 deńgeıinde, al Azııa men Tynyq muhıty aımaǵynda 2,7 paıyz deńgeıinde tirkeldi. Sonymen birge Afrıka, Latyn Amerıkasy jáne Taıaý Shyǵysta múlik kerisinshe ósti.
Buǵan Reseıdiń Ýkraınaǵa qarsy soǵysy aıasynda munaı men gaz baǵasynyń ósýi jol saldy.
Capgemini qarjylyq zertteýler bóliminiń basshysy Elıas Ganem mıllıonerlerdiń azaıýy men aktsıonerlik bırjalardaǵy jaǵdaı arasynda tikeleı baılanys bar dep sanaıdy.
Ótken jyly amerıkandyq NASDAQ ındeksi 33 paıyzdy, frantsýzdyq CAC 40 - 9,5 paıyzdy, al nemis DAX - 12 paıyzdy joǵaltty.
