Álemde qos palataly Parlament júıesi belsendi tájirıbege aınalyp barady - N. Nyǵmatýlın
ASTANA. 28 qarasha. QazAqparat - Álemde qos palataly Parlament júıesi belsendi tájirıbege aınalyp barady.
Búgin Astanada ótip jatqan «Qazaqstan Respýblıkasynyń Tuńǵysh Prezıdenti - Elbasy N. Nazarbaevtyń Qazaqstanda parlamentarızmniń qalyptasýyndaǵy róli» atty konferentsııa barysynda Májilis tóraǵasy Nurlan Nyǵmatýlın osylaı málim etti.
«Óz tańdaýy barysynda Qazaqstan búkil álemdik úderis arnasynan aýytqyǵan joq. Sonyń aıǵaǵy qos palataly Parlament júıesi. Al jalpy alǵanda bir partııaly parlamentten eki palataly júıege aýysý sońǵy ýaqytta álemdik qaýymdastyqta barynsha belsendi tájirıbege aınalyp barady. Máselen, ótken ǵasyrdyń 80-jyldarynyń basynda eki palataly Parlament tek 45 memlekette ǵana bolǵan edi. Al qazirdiń ózinde olardyń sany kemigen joq, kerisinshe artyp, álem boıynsha 70-ten asty. Sonymen birge, taǵy onǵa tarta memleket jaqyn aralyqta óz Parlamentterin qos palataly qurylymǵa aýystyrýǵa umtylyp jatyr», - dedi Májilis spıkeri.
Onyń aıtýynsha, tájirıbe kórsetkenindeı, Qazaqstannyń qos palataly júıege kóshýi zań shyǵarý úderisiniń tıimdiligin, ónimdiligin arttyryp qana qoımaı, elimizdegi demokratııalyq úderistiń qalyptasýyna barynsha yqpal etti.
