Álemde koronavırýstyń omıkron shtamy órship tur – Aıjan Esmaǵambetova

NUR-SULTAN. QazAqparat – Qazir álem boıynsha koronavırýstyń omıkron shtamynyń taralýy 95 paıyzdy kórsetip otyr. Bul týraly QR Densaýlyq saqtaý vıtse-mınıstri, bas memlekettik sanıtarlyq dáriger Aıjan Esmaǵambetova málim etti, dep habarlaıdy QazAqparat tilshisi.

«Dúnıejúzilik densaýlyq saqtaý uıymynyń deregi boıynsha sońǵy aptada Eýropa, Shyǵys Jerorta teńizi men Afrıka óńirin sanamaǵanda, qalǵan 3 óńirde koronavırýstyń taralýy 30%-ǵa ósti. Cońǵy aptada álemniń 92 elinde syrqattanýdyń ósýi baıqalyp otyr. Onyń ishinde COVID-19 Ázerbaıjanda 115%-ǵa, Japonııada 70%, Polshada 63%, Reseıde 49% jáne Qytaıda 36%-ǵa jetip otyr. Búginde koronavırýstyń omıkron shtamy álemdegi negizgi vırýs bolyp otyr jáne órship tur. Onyń taralý úlesi zerttelgen úlgilerdiń 95 paıyzyn alady. Omıkron shtamynyń arasynda BA.5 jáne BA.4 úlesi basym. Onyń ishinde vırýstyń BA.5 túri 100 elde anyqtaldy», - dedi Aıjan Esmaǵambetova ortalyq kommýnıkatsııalar qyzmeti alańynda ótken baspasóz máslıhatynda.

Bas memlekettik sanıtar dárigerdiń málimdeýinshe, bir aptada barlyq vırýstyń túrlerimen salystyrǵanda vırýstyń BA.5 túriniń úlesi 54%-ǵa deıin ósken.

«Sonymen qatar, VA2.75 omıkronynyń (kentarv) sýbnusqasyn DDU-y baqylap otyr. Atalǵan sýbnusqany álemniń 15 eli baqylaýǵa alǵan, ol barlyq zerttelgen úlgilerdiń 0,05%-yn alady. Ázirge, basqa nusqalarmen salystyrǵanda osy mýtatsııanyń qandaı dárejesi aýrýdyń taralýy men aýyrlyǵyna áser etetini týraly dálel joq», - deıdi ol.

Onyń aıtýynsha, qazirgi kúni mýtatsııaǵa qatysty zertteý jalǵasyp jatyr.

Buǵan deıin habarlaǵanymyzdaı, shilde bastalǵaly 3 qazaqstandyq koronavırýstan qaıtys boldy. https://kaz.inform.kz/news/shildede-koronavirustan-3-naukas-kaytys-boldy-ayzhan-esmagambetova_a3959773