Álemde koronavırýstan bolǵan ólim-jitim shildede 1,5 ese artqan

MÁSKEÝ. TASS –QazAqparat – Álemde koronavırýstyń rastalǵan jaǵdaılarynyń sany shilde aıynda 30 mıllıonǵa kóbeıdi. Bul maýsym aıyndaǵydan bir jarym esege kóp. Aýrýshańdyq deńgeıi ekinshi aı qatarynan artýda, dep habarlaıdy QazAqparat TASS agenttigine silteme jasap.

Aýrý Azııada órshýde, al ınfektsııanyń joǵary taralý qarqyny áli de Eýropanyń birneshe elinde tirkelip jatyr. Ólim-jitim jaǵdaılarynyń da sany artty. Shildede 64 myńǵa jýyq adam kóz jumǵan. Bul aldyńǵy kezeńmen salystyrǵanda bir jarym ese kóp.

Túrkııada aýrý juqtyrý jaǵdaıy bir aıda alty esege ósti. Eger shilde aıynyń basynda elde 8 myńǵa jýyq adamǵa kovıd dıagnozy qoıylsa, aıdyń sońynda olardyń sany 50 myńǵa jetti. Eń kóp ósim – qazir álemde aýrý juqtyrýshylar sany boıynsha birinshi orynda turǵan — Japonııa. Bir aıdyń ishinde ondaǵy kórsetkish birden 10 esege artqan, shildeniń basyndaǵy 23 myń bolsa, aıaǵynda 230 myńǵa jetken. Ońtústik Koreıada da kórsetkish 11 myńnan 100 myńǵa deıin, ıaǵnı 10 esege jýyq ósken.

Eýropa elderiniń kópshiliginde kovıdtiń taralý shyńy shilde aıynyń ortasynda boldy, al aıdyń sońǵy kúnderinde kórsetkish kúrt tómendegen. Frantsııada aıdyń ekinshi jartysynda aýrýshańdyq alty esege (shilde aıynyń sońynda onda 30 myńǵa jýyq jańa jaǵdaı tirkeldi), Italııada 3,5 esege (táýligine 40 myńǵa deıin) azaıdy.

Bir aıda qaıtys bolǵandardyń besten bir bóligi koronavırýstan bolǵan ólim-jitim boıynsha birinshi orynda turǵan AQSh-qa keledi. Maýsymmen salystyrǵanda munda qaıtys bolǵandar sany 10%-ǵa artqan. Ekinshi orynda shildede 7 myńǵa jýyq adam kóz jumǵan Brazılııa tur, bul bir aı burynǵydan bir jarym ese kóp. Úshinshi orynda turǵan Germanııada 3,1 myń ólim jaǵdaıy tirkeldi, bul jazdyń birinshi aıymen salystyrǵanda 50%-ǵa az.

Buǵan deıin DDU habarlaǵandaı, ótken aptada 6,5 mıllıonnan astam adam koronavırýs ınfektsııasyn juqtyrǵan, 14 myńnan astamy qaıtys bolǵan.

Foto: tass.ru