Álemde koronavırýstan bolǵan ólim-jitim 2020 jyldyń kóktemindegi kórsetkishke deıin tómendedi

MÁSKEÝ. TASS - QazAqparat - Álemde koronavırýs ınfektsııasyn juqtyrý jaǵdaılarynyń sany mamyr aıynda shamamen 15,9 mıllıonǵa ósti, dep habarlaıdy QazAqparat TASS aqparat agenttigine silteme jasap.

Bul ótken jyldyń qazan aıyndaǵy kórsetkishke sáıkes keledi.
Qaýipti vırýstan bolǵan ólim-jitim kórsetkishi ótken aımen salystyrǵanda úshten bir ese tómendep, 2020 jylǵy kóktemniń basynan bergi eń tómengi deńgeıde boldy. Mamyr aıynda álemde koronavırýstan 55 myńǵa jýyq adam qaıtys boldy.

Aýrýǵa shaldyǵý kórsetkishi jaǵynan birinshi orynda turǵan – AQSh. Onda 3 mıllıonǵa jýyq juqtyrý jaǵdaıy anyqtaldy. Elde vırýs juqtyrý kórsetkishi ótken aımen salystyrǵanda eki ese artyp, aqpandaǵy kórsetkishke jetken.

Kovıd juqtyrý kórsetkishi jaǵynan Germanııa ekinshi orynda tur. Onda 1-31 mamyr aralyǵynda 1,7 mıllıonnan astam adam vırýs juqtyrǵan. Bul rette, sáýirde olardyń sany eki esege jýyq kóp boldy.

Aýrý juqtyrǵandar sany jaǵynan «úshtikke» kirgen – Avstralııa. Onda vırýs juqtyrý kórsetkishi shamamen sáýir aıyndaǵy deńgeıde qaldy, ıaǵnı bir aıda elde 1,7 mıllıonǵa jýyq naýqas tirkeldi.

Alǵashqy «bestikke» sondaı-aq Japonııa men Frantsııa kirip otyr. Bul elderde mamyr aıynda 1 mıllıonǵa jýyq adamǵa koronavırýs dıagnozy qoıylǵan.