Álemde koronavırýs juqtyrý kórsetkishi bir aptada 15 paıyzǵa tómendedi

JENEVA. TASS-QazAqparat – Ótken aptada álemde koronavırýs juqtyrýdyń 3,5 mln astam oqıǵasy jáne odan qaıtys bolýdyń 78 myńnan astam oqıǵasy tirkeldi. Onyń aldyndaǵy jeti kúnmen salystarǵanda, aýrýǵa shaldyǵý deńgeıi 15 paıyzǵa, al ólim-jitim oqıǵalary – 7 paıyzǵa tómendegen. Bul týraly sársenbige qaraǵan túni Dúnıejúzilik densaýlyq saqtaý uıymy (DDSU) málimdedi, dep habarlaıdy QazAqparat TASS agenttigine silteme jasap.

«Ótken aptanyń ishinde COVID-19 juqtyrý oqıǵalary men odan bolǵan ólim-jitim tómendedi: vırýs juqtyrǵan 3,5 mln adam men odan qaıtys bolǵan 78 myńnan astam adam týraly habarlama keldi, bul aldyńǵy aptamen salystyrǵanda tıisinshe 15% jáne 7%-ǵa az», - dep atap ótti DDSU óziniń apta saıynǵy epıdemıologııalyq bıýlleteninde.

24-30 mamyr aralyǵynda álemde ınfektsııa juqtyrǵan 3 550 456 adam men odan qaıtys bolýdyń 78 667 oqıǵasy tirkelgen. 30 mamyrdaǵy jaǵdaı boıynsha, ınfektsııa juqtyrýdyń barlyǵy 169 604 858 oqıǵasy men 3 530 837 ólim oqıǵasy tirkeldi.

Ótken aptada aýrý juqtyrý deńgeıi Afrıkada 22 paıyzǵa, Batys-Tynyq muhıty aımaǵynda 6 paıyzǵa ósse, Eýropada ınfektsııa juqtyrýdyń jańa oqıǵalarynyń sany 26 paıyzǵa, Ońtústik-Shyǵys Azııada – 24 paıyzǵa, Soltústik jáne Ońtústik Amerıkada – 2 paıyzǵa, Shyǵys Jerorta teńizinde – 1 paıyzǵa tómendegen. Afrıkada vırýstan bolǵan ólim-jitim deńgeıi 11 paıyz ósse, Shyǵys Jerorta teńizinde 18 paıyzǵa, Eýropada – 17 paıyzǵa, Ońtústik-Shyǵys Azııada – 8 paıyzǵa, Batys-Tynyq muhıty aımaǵynda 2 paıyzǵa jáne Soltústik jáne Ońtústik Amerıkada – 1 paıyzǵa tómendegen.

Eýropada jeti kúnniń ishinde 430 myńnan astam adam aýrý juqtyryp, 11 myńnan astamy kóz jumdy.

Soltústik jáne Ońtústik Amerıkada ınfektsııa juqtyrýdyń 1,1 mln astam jańa oqıǵasy jáne 31 myńnan astam ólim oqıǵasy tirkeldi.

Ońtústik-Shyǵys Azııada dárigerler vırýs juqtyrǵan 1,5 mln astam adamdy anyqtaǵan, 29 myńnan astam adam qaıtys boldy.

Úndistanda vırýs juqtyrǵandar sany bir aptada 1,3 mln astam adamǵa kóbeıdi.

Odan keıin tizimde Brazılııa (420 myńnan astam jańa oqıǵa), Argentına (219 myńnan astam oqıǵa), AQSh (153 myńnan astam oqıǵa), Kolýmbııa (150 myńnan astam), Iran (69 myńnan astam), Reseı (61 myńnan astam), Frantsııa (60 myńnan astam), Túrkııa (57 myńnan astam), Nepal (47 myńnan astam), Chılı (46 myńnan astam) jáne Indonezııa (39 myńnan astam) elderi tur.