Álemde koronavırýs juqtyrǵandar sany 8,2 mıllıonnan asty
JENEVA. QazAqparat – Dúnıejúzilik densaýlyq saqtaý uıymy (DDSU) deksametazondy paıdalanýda saq bolýǵa shaqyrady. Brıtandyq ǵalymdardyń pikirinshe, deksametazon Covid-19 vırýsymen aýyryp jatqan aýyr haldegi naýqastardyń ómirin qutqarady. DDSU preparatty tek dárigerlerdiń baqylaýymen ǵana qoldaný kerek ekenin atap ótti, dep habarlaıdy QazAqparat Bı-Bı-Sıge silteme jasap.
DDSU atap ótkendeı, dári-dármek vırýstyń aldyn alatyny nemese aýrýdyń jeńil túrimen aýyratyn naýqastarǵa kómektesýi múmkin ekeni týraly málimetter joq.
Djons Hopkıns ýnıversıtetiniń statıstıkasy boıynsha álemde Covid-19 juqtyrý jaǵdaılarynyń sany 8,2 mln adamdy qurady. Vırýstan 444 myńǵa jýyq adam kóz jumǵan.
Aýrý juqtyrǵandardyń basym kópshiligi AQSh-ta. Onda 2,1 mıllın adam koronavırýs juqtyrǵan. AQSh-tyń izinshe Latyn Amerıkasy, onyń ishinde Brazılııa keledi. Aýrýdy baqylaý jáne aldyn alý eýropalyq ortalyqtyń málimetinshe, Ońtústik Afrıkada rastalǵan jaǵdaılar sany – 1,6 mln.
Osy turǵyda Beıjiń bıligi Covid - 19 ekinshi tolqynynyń aldyn alýǵa tyrysady. Qala is júzinde syrtqy álemnen oqshaýlanǵan. Sársenbi kúni Beıjiń áýejaıy myńnan astam reısti toqtatty.
Santıagoda karantın kúsheıtildi
Chılı astanasy Santıagoda eldegi aýrý juqtyrý sany kúrt óskennen keıin karantın rejımi kúsheıtildi.
Chılı - Ońtústik Amerıkadaǵy pandemııadan kóp zardap shekken elderdiń biri. Densaýlyq saqtaý mınıstrliginiń málimeti boıynsha, elde 220,6 myńnan astam adamnan Covid-19 aýrýy anyqtalǵan. 3,3 myńnan astam adam qaıtys bolǵan.
Shvetsııada 5000 adam qaıtys bolǵan
Shvetsııa bıligi Covid-19 pandemııasynan elde 5000 adam qaıtys bolǵanyn jarııalady. Bul kórshiles elderge qaraǵanda áldeqaıda kóp. Shved bıligi pandemııanyń bastalǵanda qatań karantın engizbeý týraly sheshim qabyldaǵan bolatyn.
AQSh-tyń úsh shtatynda ınfektsııanyń táýliktik deńgeıi rekordtyq kórsetkishke jetken
Arızona, Florıda jáne Tehas shtatynyń bıligi sońǵy 24 saǵat ishinde koronavırýs aýrýynyń rekordtyq sanyn málimdedi. AQSh-tyń osy úsh shtatynyń árqaısysynda shamamen 2500 jaǵdaı tirkelgen.
Florıda gýbernatory Ron De Santıs baspasóz máslıhatynda ınfektsııalar sanynyń kóbeıýin karantın rejıminiń álsireýimen baılanystyrmaıtynyn aıtty.
«Biz jabylmaımyz. Qoǵam jumysyn jalǵastyrýy kerek «, - dedi ol.
AQSh-tyń bas epıdemıology Entonı Faýkı AQSh áli de koronavırýstyq pandemııanyń alǵashqy tolqynyn bastan ótkerip jatqanyn aıtty.
Basqa elderdegi jaǵdaı
Germanııadaǵy et kombınatynda koronavırýstyń órshýine baılanysty 7 myńǵa jýyq adamdy oqshaýlaý týraly sheshim qabyldandy. Vırýs kásiporynnyń 400-den astam qyzmetkerinen anyqtaldy. Gondýras prezıdenti Hýan Orlando Ernandes Covid-19 juqtyryp, aýrýhanaǵa jatqyzyldy. Onyń baspasóz hatshysy prezıdent pnevmonııa ekenin habarlady. Prezıdenttiń zaıybynan da koronavırýs anyqtaldy, biraq onyń aýrýy sımptomsyz. Brıtanııada úsh aı úzilisten keıin fýtboldan Premer-lıga oıyndary qaıta jandandy. Oıyndar bos stadıondarda ótedi.
Brazılııada táýligine 35 myńǵa jýyq koronavırýs juqtyrý jaǵdaıy tirkeledi. Apta sońyna qaraı munda bir mıllıon adamnan asady.
Latyn Amerıkasy pandemııanyń jahandyq ortalyǵyna tez aınalýda. AQSh vırýs juqtyrý sany boıynsha álemde kósh bastap tur.
