Álemde koronavırýs juqtyrǵandar sany 25 mıllıonnan asty
BERLIN. QazAqparat – Koronavırýs álemniń 25,16 mıllıon turǵynynan anyqtaldy, bul derekti Worldometer halyqaralyq eriktiler toby keltirdi.
Olardyń baǵalaýynsha, 30 tamyz jeksenbi kúni tańerteń COVID-19 aýrýynan 846 772 adam qaıtys boldy, al 17,5 mıllıonnan astam naýqas saýyqty, dep habarlaıdy QazAqparat Deutsche Welle teleradıokompanııasyna silteme jasap.
Sońǵy ýaqytta Batys Eýropada aýrý juqtyrǵandar sany artty, bul turǵyndardyń demalystan oralýymen baılanysty. Kóptegen elder ınfektsııany tejeý sharalaryn taǵy da qatańdatýǵa májbúr. Osylaısha, Germanııada kem degende, jyl sońyna deıin iri sharalarǵa tyıym salyndy. Al Majarstan 1 qyrkúıekten bastap EO memleketteriniń alǵashqysy bolyp sheteldikter úshin shekarany qaıtadan jabady. Bul shekteý sharasy bir aıǵa sozylady.
Buǵan deıin Ýkraına da sheteldikterge bir aı merzimge shekarany japqan edi. Onda 29 tamyzda rastalǵan aýrýdyń ósimi (2481 jaǵdaı) eldegi eń joǵarǵy mejeni kórsetti. Aýrý juqtyrǵandardyń jalpy sany 116 978 adamǵa jetti, onyń ishinde 2492 adam qaıtys bolyp, 56 138 naýqas jazylyp shyqty. Ýkraınanyń densaýlyq saqtaý mınıstrligi atap ótkendeı, naýqastardyń kópshiligi Lvov oblysynda (14 168), Kıevte (12 984) jáne Chernovtsy oblysynda (9997) tirkelgen.
Al Reseıde tamyz aıynyń ortasynan bastap jańa juqtyrý jaǵdaılarynyń kólemi 5000-nan asqan joq. Jedel shtab málimetteri boıynsha 29 tamyzǵa qaraı elde koronavırýs ınfektsııasy 985 346 adamnan anyqtalǵan, 17 025 naýqas qaıtys bolyp, 804 383 saýyqqan.
COVID-19 qozdyrǵyshy 2019 jyldyń aıaǵynda Qytaıdyń Hýbeı provıntsııasynda tarap, 210-nan astam el men aýmaqqa jetti. Eń kóp ınfektsııa AQSh-ta (6,13 mıllıon), Brazılııada (3,84 mıllıon) jáne Úndistanda (3,53 mıllıon) baıqaldy.
