Álemde koronavırýs juqtyrǵandar sany 18,8 mıllıonnan asty
PARIJ. QazAqparat – Eýropanyń birneshe elinde koronavırýs juqtyrǵandar sany kúrt artty.
Germanııa belgııalyq Antverpendi qaýip aımaǵy dep atady. Polshanyń birneshe aýdanynda maska taǵý mindetteldi. Los-Andjeleste túrli saýyq keshteriniń uıymdastyrylýyn boldyrmaý úshin jaryqty sóndirip tastaıtyn bolǵan. Álemde indetke shaldyǵý jaǵdaılarynyń sany 18,8 mıllıonnan asty. Koronavırýs indeti taraǵaly 708,3 myń adam kóz jumǵan. Bul týraly QazAqparat BBC agenttigine silteme jasap habarlaıdy.
Eýropanyń birneshe elinde, onyń ishinde Frantsııada, Ispanııa men Germanııada koronavırýs juqtyrýdyń jańa jaǵdaılary kóbeip ketti. Mamandar demalys kezeńi epıdemııanyń ekinshi tolqynyna ákelýi múmkin dep qaýiptenedi.
Frantsııada bir táýlikte indetke shaldyǵýdyń 1695 jańa oqıǵasy anyqtaldy. Bul – sońǵy eki aı ishindegi eń joǵarǵy kórsetkish. Іndet taraǵaly elde 228,5 myń adam aýyrǵan. Frantsııa indetten qaıtys bolǵandardyń sany boıynsha Eýropada Brıtanııa men Italııadan keıingi úshinshi orynǵa shyqty.
Maýsym aıynda karantın sharalary jeńildetile bastaǵan Ispanııada 24 saǵat ishinde 1772 adamnyń Covid-19-ǵa tapsyrǵan testi oń nátıje kórsetken. Elde barlyǵy 305,7 myń aýrý juqtyrý jaǵdaıy anyqtalǵan.
Shveıtsarııa Ispanııadan kelgender úshin mindetti eki aptalyq oqshaýlaý rejımin engizdi.
Germanııada sanıtarlyq-epıdemııalogııalyq qadaǵalaý qyzmeti iri belgııalyq Antverpen qalasyn qaýip aımaǵy dep atady. Sondyqtan da osy qaladan kelgenderdiń barlyǵy oqshaýlanýy kerek. Sondaı-aq Robert Koh ınstıtýty úsh aıdae bergi bir táýlik ishindegi eń kóp aýrý juqtyrý kórsetkishin tirkedi. Munda bir táýlikte 1045 adam koronavırýsqa shaldyqqan. 7 mamyrdan beri alǵash ret táýliktik kórsetkish myńnan asty.
Polshanyń keıbir aýdandarynda negizinen eldiń ońtústiginde jáne shyǵysynda, maska taǵý qaıtadan mindetteldi, dep málimdedi eldiń Densaýlyq saqtaý mınıstri Lýkash Shýmovskıı. Onyń aıtýynsha, Covid-19 juqtyrǵandar sanynyń ósýine baılanysty shekteýler aýrý deńgeıi eń joǵary 19 ákimshilik birlikke qatysty bolmaq.
Los-Andjeleste indetpen kúresýdiń erekshe jolyn oılap tapty. Qala meri Erık Garsettı óziniń ákimshiligine juma kúninen bastap saýyq keshi ótetin oryndarda elektr qýaty men sýdy óshirýge ruqsat berdi.
