Álemde koronavırýs juqtyrǵandar sany 10 mıllıonnan asty
NUR-SULTAN. QazAqparat - Álemde vırýs juqtyrǵandar 10 mıllıonnan asty. Epıdemııa bastalǵaly beri 500 myńnan astam adam qaıtys bolǵan, dep habarlaıdy baq.kz.
Álemde naýqastar sany jaǵynan birinshi orynda AQSh tur. Munda 2,5 mıllıon adamnan koronavırýs tabylǵan, 128 myńnan astam naýqas COVID-19-dan qaıtys bolǵan. Ekinshi orynda turǵan Brazılııada 1 mıllıon 300 myń adamǵa vırýs juqqan. 57 myńnan astam adam indetten kóz jumǵan.
Úshinshi orynda turǵan Reseıde 634 myńnan astam adamǵa COVID-19 dıagnozy qoıylǵan. Úsh jarym aıdan astam ýaqyttan beri 9 myńnan astam naýqas qaıtys bolǵan. Ótken táýlikte 6 791 adamnan vırýs tabylǵan, 104 naýqas qaıtys bolǵan.
Reseı bıligi statıstıkaǵa COVID-19 dıagnozy qoıylǵan qaıtys bolǵan barlyq naýqastardy engizbeıtinin moıyndaǵan. Tek naýqastyń ólimine ınfektsııa sebep boldy dep sheshilse ǵana esepke engiziledi.
Federaldyq shtab statıstıkasy aımaqtyq statıstıkamen kóp jaǵdaıda sáıkes kele bermeıdi. Al shtab pen Rosstat, aımaq málimeti arasynda aıyrmashylyq bar. Sheneýnikter muny esepteýdiń túrli ádisterin qoldanatyndyǵymen túsindiredi.
Qazaqstan boıynsha koronavırýs indetin juqtyrǵandar sany 20780 adamǵa jetse, jazylyp shyqqandardyń qatary 12824 adamǵa jetti. Al qaterli indetten kóz jumǵandar sany elimiz boıynsha 173 adam boldy.
