Álemde qant dıabetinen 500 mıllıonnan astam adam zardap shegedi
Ulttyq baspasóz máslıhatynda memlekettiń, medıtsınalyq qoǵamdastyqtyń, bıznestiń jáne qant dıabetimen kúres jónindegi patsıentterdiń birlesken sharalary talqylandy, dep habarlaıdy Kazinform mınıstrliktiń baspasóz qyzmetine silteme jasap.
QR Densaýlyq saqtaý mınıstrligi uıymdastyrǵan is-shara «Novo Nordısk Qazaqstan» JShS kompanııasynyń qatysýymen memleket, medıtsınalyq qoǵamdastyq, bıznes jáne patsıentter ókilderin jınady.
Halyqaralyq dıabet federatsııasynyń (IDF) derekterine sáıkes álemde qant dıabetinen 537 mln-nan astam adam zardap shegedi. Al Qazaqstanda bul kórsetkishtiń ósý úrdisine kelsek, 400 myńnan astam adam. Konferentsııanyń talqylaýy qant dıabetimen baılanysty qıyndyqtardy jeńý úshin Úkimet, medıtsınalyq qaýymdastyq, bıznes jáne patsıent uıymdarynyń arasyndaǵy birlesken sheshimderdi tabýǵa baǵyttalǵan.
Jyl saıyn 14 qarashada álem Dúnıejúzilik qant dıabetimen kúres kúnin atap ótedi. Dál osy kúni ınsýlınniń negizgi ázirleýshileriniń biri Frederık Bantıng dúnıege keldi. Búkil álemde jáne Qazaqstanda qant dıabeti indetiniń órshýine baılanysty konferentsııaǵa qatysýshylar birlesken kúsh-jigerdiń shuǵyl qajettiligin bildirdi.
Memleket qant dıabetimen aýyratyn adamdarǵa tegin emdeý jáne dári-dármek berý arqyly belsendi qoldaý kórsetedi. Medıtsınalyq hattamalar jetekshi ǵylymı qaýymdastyqtardyń standarttaryna qatań sáıkes keledi jáne olar ózektiligin qamtamasyz etý úshin únemi jańartylyp otyrady.
QR DSM Medıtsınalyq kómekti uıymdastyrý departamentiniń áleýmettik máni bar aýrýlar kezindegi medıtsınalyq kómek basqarmasynyń basshysy Gúlnara Maqsutova memleket qant dıabetimen aýyratyn adamdarǵa qoldaý kórsetetinin atap ótti.
«Memleket qant dıabetimen aýyratyn adamdarǵa qoldaý kórsetedi jáne patsıentterdi dárilik zattarmen jáne qajetti emdeýmen, onyń ishinde ınnovatsııalyq quraldarmen tegin qamtamasyz etý boıynsha óńirde jetekshi oryn alady. Tegin negizde patsıentterge senimdi dáleldi bazasy bar preparattardyń barlyq derlik toptary qoljetimdi. Sonymen qatar jalpy saqtandyrý aıasynda dıagnostıkalyq skrınıngter men qajet bolǵan jaǵdaıda emdeýge jatqyzý engizildi», - dedi ol.
Alaıda IDF derekterine sáıkes Qazaqstanda kóptegen adam óz aýrýy týraly bilmeıdi. 2021 jyly 808 myńǵa jýyq adam qant dıabetimen aýyrǵan, biraq olardyń 320 myńy anyqtalmaǵan. Konferentsııa barysynda aýrýdyń ósý faktorlaryna ózgergen ómir salty, genetıka jáne bastapqy dıagnozdyń bolmaýy áser etetini aıtyldy.
Dıabettik ata-analar komıtetiniń prezıdenti Rýslan Zakıev patsıentterge kútim jasaý jáne ómir súrý sapasyn jaqsartýdyń, sondaı-aq qant dıabetimen aýyratyn adamdardy aqparattandyrý jáne qorǵaý is-sharalarynyń mańyzyn atap ótti.
