Álemde ınvestıtsııa úshin báseke kúsheıdi, Úkimet pen ákimder osyǵan basa nazar aýdarýǵa tıis - Toqaev
«Aqtaý teńiz porty» arnaıy ekonomıkalyq aımaǵy mol múmkindik týǵyzyp otyr. Bul aımaq – ınvestıtsııa tartý, ónim óndirý, salyq tóleý kórsetkishteri boıynsha respýblıkada eń úzdik úsh aımaqtyń biri. Buǵan deıin men arnaıy ekonomıkalyq aımaqtarda bos jatqan jer telimderin ınfraqurylymmen qamtamasyz etýdi tapsyrdym. Osy jumysty jandandyramyz. Úkimet arnaıy ekonomıkalyq aımaqtardyń jumys isteý merzimin uzartýy qajet dep esepteımin. Qazaqstan sheteldik áriptestermen ınvestıtsııalyq yntymaqtastyqty damytyp kele jatyr. Sonyń biri – «Jasyl» sýtegin óndirý jáne taratý ortalyǵyn» salý jobasy», - dep atap ótti Prezıdent.
Onyń aıtýynsha, ó tken aptada Eýropa keńesiniń Prezıdenti Sharl Mıshel bizdiń elge resmı saparmen kelgen.
Sol kezde Qazaqstan men «Nemis-Shved» kompanııasy arasynda ınvestıtsııa týraly tıisti kelisimge qol qoıyldy.
Investor Mańǵystaý oblysynda «jasyl» sýtegi óndirisin iske qosýdy josparlap otyr.
«Sondaı-aq, kúnine 255 myń tekshemetr sý tushytatyn zaýyt, 40 gıgavatt jańǵyrtylatyn qýat kózderi stansasyn salý josparda tur. Osy joba júzege asyrylsa, qurylys kezinde 3500, al nysan iske qosylǵan kezde 1800 turaqty jumys ornyn ashýǵa múmkindik týady. Óz mamandarymyzdy oqytyp, daıarlaımyz. Tıisti ınfraqurylym salynady. Investor ózine júktelgen áleýmettik mindettemelerin oryndaıdy. Aımaqtyń damýyna keshendi áleýmettik-ekonomıkalyq áserin tıgizetin osyndaı jobalar kóp bolýy kerek. Qazir búkil álemde ınvestıtsııa úshin báseke kúsheıdi. Bizdiń elimiz óz áleýetin tolyq paıdalanyp, ınvestıtsııalyq ahýaldy jaqsartýǵa myqtap kirisýi kerek. Taǵy da qaıtalap aıtamyn: Úkimet pen ákimder birlesip, bul máselege basa nazar aýdarýǵa tıis», - deıdi Memleket basshysy.
Ashyq kózderden alynǵan foto
