Álemde halyq sany azaıyp barady — nemis demografy
ASTANA. KAZINFORM — Álemde 8 mıllıardtan astam adam ómir súrse de, kóp elde halyq sany azaıyp barady. Nemis demografy Martın Býııard qazir dúnıejúzinde bala sany azaıǵanyn aıtyp, dabyl qaqty. Bul týraly Bild agenttigi jazdy.
Vısbadendegi Federaldyq demografııa ınstıtýtynyń zertteýler dırektory Martın Býııard Germanııada týý deńgeıi ár áıelge shaqqanda 1 jarym balaǵa da jetpeıtinin aıtyp, bul kórsetkish qaýipti dep sanady. Demografııada 1,5-ten tómen kórsetkish krıtıkalyq dep esepteledi.
Onyń aıtýynsha, halyqty turaqty kóbeıtý úshin shamamen 2,1 bala qajet. Sol kezde ǵana elde jastar jetkilikti bolyp, halyq qartaıa bermeıdi. Halyq sanynyń azaıýy úlken problema emes. Eń mańyzdysy — halyqtyń jas qurylymy.
— Germanııada 85 mıllıon nemese 70 mıllıon adam ómir súrse de ómir sapasyna áser etpeıdi. Eger jastar sany azaıyp, zeınetke shyǵatyn adamdar kóp bolsa, onda jaǵdaı qaýipti bolady, — deıdi ol.
Bul daǵdarystyń qaýiptiligi ol baıaý jáne baıqalmaı damıdy: búgin dúnıege kelmegen balalardyń jetispeýshiligi 20 jyldan keıin ǵana seziledi. Ol kezde kásiptik mektepterde oqýshylar, bilikti mamandar jáne salyq tóleýshiler jetispeıtin bolady.
— Másele 40 jyl buryn bul tek keıbir Eýropa elderine jáne Japonııaǵa qatysty edi. Qazir álemniń kóp elin qamtıdy, — deıdi Býııard.
Erekshelik — Afrıka men arab elderi.
Jaǵdaı ásirese Azııada kúrdeli. Ońtústik Koreıada bir áıelge shaqqanda týý deńgeı shamamen 0,8 bala bolsa, Gonkongta odan da tómen. Al Afrıka men arab elderi kerisinshe.
Býııardtyń aıtýynsha, kóp adam otbasyly bolýdy qalaıdy, alaıda deni balaly bolýdy keıinge qaldyryp keledi.
— Adamdar balaly bolýdy keıinge qaldyrǵan saıyn, óz armandaryn júzege asyrý múmkindigi azaıa beredi, — deıdi demograf.
Aıta keteıik, Japonııada demografııalyq quldyraý 45 jyl qatarynan jalǵasyp keledi.
