Álemde gepardtar attraktsıony bar jalǵyz tsırk gastrolmen Astanaǵa keldi
ASTANA. 11 qyrkúıek. QazAqparat - Elordaǵa ataqty Máskeýlik Úlken tsırktiń jetekshi aktrısasy Darıa Kostıýk bastaǵan reseılik ujym gastrolmen keldi.
Olar 14-29 qyrkúıek aralyǵynda "Qııal araly" atty jańa baǵdarlama usynatyn bolady. Búgin Astanada atalmysh ujym balalar úıleriniń tárbıelenýshileri men múgedek jetkinshekterge arnap alǵashqy qaıyrymdylyq qoıylymyn usyndyy.
"Astanaǵa bizdiń bul alǵash kelýimiz. Bunyń aldynda biz Almaty qalasynda óner kórsetken edik. Tsırk ujymy týraly aıtatyn bolsaq, joba tyń jáne jańa, biz byltyr qurylǵan bolatynbyz. Astanaǵa 40 ártisimiz kelip otyr. Sonymen qatar bizdiń ujymda on gepard, on ıt, tórt totyqus, alty mysyq jáne bir kengýrý bar. Baǵdarlama tutas bir qoıylym ispetti. Sebebi biz o bastan árbir ártistiń kishigirim nomerlerimen bólingen klassıkalyq tsırkten góri, aýqymdy dúnıe jasaýdy maqsat ettik", - deıdi joba avtory, tsırk jetekshisi D.Kostıýk.
Qoıylym rasynda da kúrdeli jáne alýan túrli. Kórermender tsırk ujymynyń úsh túrli manejdegi: kilemde, muzda jáne sýdaǵy ónerin tamashalaıtyn bolady. Atalmysh tsırk álemde gepardtar attraktsıony bar jalǵyz ujym. Shoýda eń zamanaýı tehnıkalyq jasaqtaýlar, kompıýterlik grafıka, 20 metrlik fontandar men lazerlik arnaıy effektileri qoldanylady.
"Biz úsh manejde ótetin bul baǵdarlamany ınjenerlermen birge jasaqtadyq. Sebebi tsırkke kelgen árbir kórermen tehnıkalyq jaraqtalǵan, sapaly ári naǵyz tsırkti kórýi tıis", - deıdi ol.
Jobanyń sıýjettik jelisi de teńdessiz jáne óziniń boıyna mıýzıkl, kıno, tsırk pen bıdiń elementterin qamtyǵan. Ujymnyń kórkemdik jetekshisi D.Kostıýktiń aıtýynsha, bundaı sıýjet tsırk aýdıtorııasyn balalarmen ǵana shektep qoımaı, atalmysh jobaǵa jastardyń da qyzyǵýshylyǵyn aýdarýǵa septigin tıgizgen.
