Álemde esirtki qoldanýshylar sany on jyl ishinde 23 paıyzǵa ósti

ASTANA. QazAqparat - Sońǵy 10 jylda esirtkige táýeldiler sanynyń ósýine sıntetıkalyq esirtkige suranystyń artýy áser etti. BUU-nyń esirtki jáne qylmys jónindegi basqarmasynyń baıandamasynda osylaı delingen, dep habarlaıdy QazAqparat DW agenttigine silteme jasap.

Álemde esirtki qoldanýshylar sany 10 jyl ishinde 23 paıyzǵa ósti.

2011 jyly esirtkige táýeldiler sany 240 mln adam bolsa, 2021 jyly 296 mln-ǵa deıin artqan.

Bul rette esirtki zattaryn paıdalanýmen baılanysty densaýlyǵy buzylǵan adamdar sany sol kezeńde 45 paıyzǵa - 39,5 mln-ǵa deıin ósti.

Mundaı derekter BUU Esirtki jáne qylmys jónindegi basqarmasynyń (BUU EQB) 26 maýsymda jarııalaǵan baıandamasynda keltirilgen.

Nashaqorlar sanynyń ósýi ishinara jer halqynyń jalpy ósimimen ǵana túsindiriledi, dep jazady sarapshylar.

Olar taǵy bir mańyzdy faktor retinde «arzan, jeńil jáne jyldam óndirisiniń» arqasynda kóptegen zańsyz naryqty túbegeıli ózgertken sıntetıkalyq esirtkiniń taralýyn kórsetken.

Baıandama avtorlary mysal retinde fentanıldi keltiredi.

Zańsyz shyǵarylatyn, quramynda apıyn bar bul analgetıkten Soltústik Amerıkada 2021 jyly shamamen 90 myńǵa jýyq ólim tirkelgen.

Baıandamada eń osal top jastar ekeni aıtylǵan. Afrıkada nashaqorlyqtan emdeletin adamdardyń 70 paıyzy - 35 jasqa tolmaǵandar.

Bul rette búkil álemde mundaı emdeýdi qajet etetin adamdardyń tek 20 paıyzy - jastar, delingen BUU EQB baıandamasynda.