Álemde eń kóp reıster ushatyn áýejaılar ataldy
YSTANBUL. QazAqparat – Ystanbul áýejaıy álemdegi úlken áýe aılaqtarynyń biri boldy, dep habarlaıdy QazAqparattyń menshikti tilshisi.
Avıatsııa ındýstrııasy týraly derekterdi óńdep, taldaıtyn «Cirium» halyqaralyq kompanııasy álemdegi eń iri áýejaılar qyzmetine qorytyndy jasady. Olardyń málimeti boıynsha, álemdegi mańyzdy áýejaılardyń úshtiginde Ystanbul áýe aılaǵy bar.
Ol Maındaǵy Frankfýrt áýejaıynan keıingi ekinshi orynda tur. Germanııanyń Frankfýrt áýejaıyndaǵy «Lufthansa» negizgi haby 330 pýnktke ushatyn reıster sanymen kósh bastady. Túrik áýejaıy 309 baǵyt boıynsha ushady. Alǵashqy úshtikti 308 baǵytqa ushýdy qamtamasyz etetin Sharl-de-Goll atyndaǵy Parıj áýejaıy túıindedi. Júktemesi kóp áýejaılar qatarynda Amsterdam áýejaıy – Shıphol, AQSh-taǵy Chıkago O’Hara men Dallas-Fort-Ýert áýejaıy, BAÁ-degi Dýbaı halyqaralyq áýejaıy, Anglııanyń Hıtroý áýe aılaqtary bar. Foto: avialiga.ua
