Álemde elektromobıl satylymy 2025 jyly rekordtyq 20,7 mln danaǵa jetti
ASTANA. KAZINFORM – 2025 jyly álem boıynsha elektromobıl satylymy aldyńǵy jylmen salystyrǵanda 20 paıyzǵa ósip, rekordtyq 20,7 mln danaǵa jetti. Mundaı derekti Londonda ornalasqan Benchmark Mineral Intelligence taldaý kompanııasy jarııalady, dep jazdy Anadolý.
Kompanııa málimetinshe, satylǵan elektromobılderdiń 12,9 mıllıony Qytaı naryǵyna tıesili. 2025 jyly Qytaıdaǵy elektromobıl satylymy 2024 jylmen salystyrǵanda 17 paıyzǵa artqanymen, jyldyń sońǵy toqsanynda ósim qarqyny baıaýlaǵan.
Sarapshylar Qytaıdaǵy ósimdi ishki naryqtaǵy joǵary báseke, agressıvti baǵa saıasaty jáne usynylatyn modelderdiń kóbeıýimen baılanystyrady. Іshki naryqtaǵy báseke kúsheıgen saıyn qytaılyq avtokólik óndirýshiler shetel naryqtaryna belsendi túrde shyǵa bastaǵan. Bul úrdisten Ońtústik Amerıka, Ońtústik-Shyǵys Azııa jáne Ortalyq Azııa elderi utyp, álemdik elektromobıl naryǵyndaǵy ósimge qosymsha serpin bergen.
Ótken jyly Eýropa naryǵyndaǵy elektromobıl satylymynyń 19 paıyzy qytaılyq brendterge tıesili bolǵan.
Benchmark Mineral Intelligence baǵalaýynsha, 2026 jyldan bastap Qytaıda elektromobılderge satyp alý salyǵy alǵash ret engiziledi. Sonymen qatar jańa avtokólik aıyrbastaýǵa arnalǵan sýbsıdııa baǵdarlamasy endi kólik baǵasyna proportsıonaldy túrde eseptelmek. Al 2025 jyly sýbsıdııalar fıksırlengen mólsherde berilip, qoljetimdi modelderge basymdyq jasalǵan edi. Osyǵan baılanysty Qytaıda 2026 jylǵy sýbsıdııa deńgeıi 2025 jylmen salystyrǵanda tómen bolady dep kútiledi.
2025 jyly Eýropada elektromobıl satylymy jyldyq eseppen 33 paıyzǵa artty. Bul kezeń Eýroodaqta ekologııalyq talaptardy qaıta qaraýmen jáne zańnamalyq ózgeristermen erekshelendi. Atap aıtqanda, birqatar elderde sýbsıdııalar keńeıtilip, tutynýshylarǵa qosymsha qoldaý kórsetildi.
Іri naryq sanalatyn Germanııada satylym 48 paıyzǵa, Ulybrıtanııada 27 paıyzǵa ósti. Al Frantsııada jyl basyndaǵy álsiz suranysqa baılanysty ósim nebári 2 paıyzdy qurady.
Sarapshylardyń aıtýynsha, aldaǵy kezeńde Eýropa naryǵy úshin basty másele – ishten janý qozǵaltqyshy bar jańa kólikterdi satýǵa tyıym salý talaptaryn jumsartý. Jańa josparǵa sáıkes, 2035 jylǵa qaraı kómirqyshqyl gazynyń shyǵaryndylaryn 100 paıyz qysqartý talaby 90 paıyzǵa deıin tómendetiledi. Qalǵan 10 paıyz shyǵaryndylar EO aýmaǵynda óndirilgen tómen kómirtekti bolat, sondaı-aq e-otyn men bıojanarmaıdy qoldaný arqyly ótelýi múmkin.
Soltústik Amerıkada (AQSh, Kanada jáne Meksıka) 2025 jyly elektromobıl satylymy 4 paıyzǵa tómendep, 1,8 mln dana boldy. AQSh-ta satylym jyldyq eseppen nebári 1 paıyzǵa ósken. Bul 2025 jylǵy 30 qyrkúıekten keıin salyqtyq jeńildikterdiń toqtatylýy jáne protektsıonıstik saýda saıasatynyń áserimen túsindiriledi.
Kanadada sýbsıdııalardyń joıylýyna baılanysty satylym 41 paıyzǵa tómendegen. Al Meksıkada kerisinshe, qytaılyq elektromobıl ımportynyń artýy esebinen satylym 29 paıyzǵa ósken.
Sarapshylardyń boljamynsha, 2026 jyly Soltústik Amerıkada elektromobıl naryǵy álsiz kúıinde qalady. AQSh-ta satylym kólemi alǵash ret sońǵy 7 jylda shamamen 29 paıyzǵa qysqarýy múmkin.
Benchmark Mineral Intelligence quramyna kiretin Rho Motion kompanııasynyń derekter jónindegi dırektory Charlz Lesterdiń aıtýynsha, 2025 jylǵy 20 paıyzdyq ósim elektromobıl naryǵynyń turaqtylyǵyn kórsetedi.
– Eýropa Qytaıdy basyp ozyp, eń jyldam damyp jatqan aımaqqa aınaldy. Soltústik Amerıkadaǵy qubylmaly jaǵdaı kútpegen jaıt emes. AQSh prezıdenti Donald Tramp qyzmetke kiriskennen beri elektromobılderdi qoldaý sharalaryn qysqartý jáne óndiristi jergiliktendirý sekildi ýádelerin oryndap keledi. Sondyqtan AQSh naryǵynyń alǵash ret jeti jylda aıtarlyqtaı qysqarýyn kútip otyrmyz, – dedi ol.
Aıta keteıik, Eýrokomıssııa elektromobılderge kóshý erejelerin jeńildetýdi usynady.
Qytaıda elektromobılderge arnalǵan qýattaý kolonkalarynyń sany qarqyndy ósip keledi.
2025 jyly Tesla elektromobılder satylymynda qytaılyq BYD-den artta qaldy.