Álemde eki mınýt saıyn bir júkti áıel qaıtys bolady
Mıllıondaǵan áıel áli de sapaly medıtsınalyq kómekke qol jetkize almaı otyr, deıdi DDSU bas dırektory.
Ár eki mınýt saıyn álemde bir áıel bosanyp jatyp nemese júktilik kezinde ómirden ótedi.
Mundaı derekter Dúnıejúzilik densaýlyq uıymy men BUU-nyń basqa da mekemeleri daıyndaǵan, 23 aqpanda jarııalanǵan «Ana ólimi tendentsııasy» baıandamasynda keltirildi.
2020 jyly 287 myń ólim tirkelgen. 2000-2015 jyldar aralyǵynda sarapshylar ana óliminiń azaıǵanyna qýanǵan edi.
Biraq 2016 jyldan 2020 jylǵa deıingi aralyqta Eýropa men Soltústik Amerıkada ana óliminiń koeffıtsıenti 17 paıyzǵa, Latyn Amerıkasy men Karıb basseıni elderinde 15 paıyzǵa artqan, delingen baıandamada.
Ólim kórsetkishi, ásirese, qaqtyǵys aımaqtary men kedeı óńirlerde kóbirek.
Sarapshylardyń pikirinshe, eń joǵarǵy absolıýtti kórsetkish burynǵysha álemniń kedeı elderi men qarýly qaqtyǵys bolyp jatqan elderde.
2020 jyly jalpy ana óliminiń 70 paıyzǵa jýyǵy Saharadan ońtústikke qaraı Afrıka elderinde tirkelgen.
Sapaly medıtsınalyq kómekke qol jetkize almaıtyn mıllıondaǵan áıel úshin júktilik «óte aýyr ári qaýipti synaq», dep málimdedi DDSU dırektory Tedros Adhanom Gebreıesýs.
Jańa derekter ár áıel men qyz medıtsınalyq kómektiń mańyzdy túrlerin júktilikke deıin, júktilik kezinde jáne bala dúnıege kelgennen keıin alatyndaı jaǵdaı jasaý kerek ekenin, ony keıinge qaldyrýǵa bolmaıtynyn kórsetti, dep atap ótti ol.
Baıandamada áıelderdiń úshten bir bóligi bosanǵanǵa deıin ótý usynylatyn segiz tekseristiń tipti tórteýinen de ótpeıtini jáne bosanǵannan keıin negizgi kómek túrleriniń ózin almaıtyny aıtylǵan. Al 270 mıllıon áıeldiń otbasyn josparlaýdyń zamanaýı tásilderin qoldanýǵa múmkindigi joq.
BUU 2023 jylǵa qaraı ana ólimin 100 000 tiri týylǵan balaǵa 70 jaǵdaıǵa deıin tómendetýdi josparlap otyr. 2000 jyly bul kórsetkish 339 jaǵdaı bolsa, 2020 jyly – 223 bolǵan.
