«Álemde daǵdarys bolsa da Qazaqstan damı beredi» - respýblıkalyq basylymdarǵa sholý
***
Keshe Aýyl sharýashylyǵy mınıstrliginde Premer-Mınıstrdiń birinshi orynbasary Serik Ahmetovtiń qatysýymen mınıstrliktiń keńeıtilgen alqa májilisi bolyp ótti. Onda 2011 jyldyń jumysy qorytyndylanyp, 2012 jyldyń mindetteri belgilendi. Osyǵan oraı, «Egemen Qazaqstan» gazetinde «Agrarlyq sala mindeti aýqymdy» degen taqyryppen maqala basyldy. Negizgi baıandamany jasaǵan Aýyl sharýashylyǵy mınıstri Asyljan Mamytbekovtiń aıtýyna qaraǵanda, ótken jyl elimizdiń agrarlyq sektory úshin jemisti boldy. 30 mıllıon tonnaǵa jýyq astyq oryldy. Aýyl sharýashylyǵyndaǵy jalpy ónim kólemi 2,2 trıllıon teńgeni qurap, 2010 jylmen salystyrǵanda 27 paıyzǵa artty. Basylymnyń atap ótýinshe, alqa májilisin qorytqan Úkimet basshysynyń birinshi orynbasary S.Ahmetov, agrarlyq salanyń aldyna zaman talabyna sáıkes kóptegen mindetter qoıdy. Azyq-túlikti turaqtandyrý qoryn damytý, qazaqstandyq úlesti arttyrý, óńdeý ónerkásibin nyǵaıtý máselelerinde nazarǵa alatyn sharýalar az emes. Osyǵan oraı Aýyl sharýashylyǵy mınıstrliginiń aldyna aldymyzdaǵy aqpan aıynda óńdeý ónerkásibin damytý jónindegi jańa tujyrymdamany ázirleýdi tapsyrdy.
«Keshe Premer-Mınıstrdiń birinshi orynbasary Serik Ahmetovtiń qatysýymen Qurylys jáne turǵyn úı-kommýnaldyq sharýashylyq isteri agenttiginiń keńeıtilgen alqa májilisi ótti. Onda negizgi baıandamany Agenttik tóraǵasy Serik Nokın jasady. Alqa otyrysynda turǵyn úı qurylysynyń, turǵyn úı-kommýnaldyq sharýashylyqtyń jáne eldi mekenderdi sýmen jabdyqtaý baǵdarlamalaryn iske asyrýdyń aralyq qorytyndylary qaraldy», - dep jazady «Egemen Qazaqstan» gazeti. Basylymnyń habardar etýinshe, Turǵyn úı-kommýnaldyq sharýashylyǵyn jańǵyrtý baǵdarlamasyna sáıkes ótken jyldan beri turǵyn úı sektoryndaǵy kóp páterli úılerdi jóndeý qaıtarymdy negizde, eki tetik boıynsha bıýdjettiń qarajaty esebinen júrgizilip jatyr. Jalpy, birinshi jáne ekinshi tetik boıynsha 2011 jyly 373 úı jóndelgen. Bul jaıynda «Turǵyn úı qurylysy qarqyndamaq» degen taqyryptaǵy maqalada keńinen baıandalǵan.
***
«Aıqyn» gazetiniń búgingi sanynda ekonomıka ǵylymdarynyń doktory, ál-Farabı atyndaǵy QazUÝ professory, akademık Saǵyndyq Satybaldınmen aradaǵy suhbat «Álemde daǵdarys bolsa da Qazaqstan damı beredi» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ǵalym, taqyrypqa tuzdyq bolǵan daǵdarys kezindegi elimizdiń damýyna qatysty jeti usynys aıtady. Máselen, ǵalym birinshi usynysynda ulttyq qorlarymyzdaǵy baılyǵymyzdyń kem degende 30 paıyzyn bıyl altynǵa aınaldyryp qoıý kerek deıdi. «Aıtalyq, AQSh óz qorynyń 70 paıyzyn altynmen jınaǵan. Altynnyń úlesi Germanııada 50 paıyzdy quraıdy. Reseıde bul kórsetkish 27 paıyzdan asyp tur. Al bizdiń Qazaqstanda ol áli kúnge deıin 10 paıyzǵa da jetken joq. Ol ol ma, Ulttyq qordaǵy mol aqsha sheteldik bankterdiń depozıtterinde jatyr. Naǵyz tabyssyz jol osy», - depti ol. S.Satybaldınniń qalǵan 6 usynysyn bilgińiz kelse, basylymnyń búgingi nómirin jiberip almańyz.
**
Byltyrǵy jyly eldegi dúrbeleńnen keıin otaý kótergen Din isteri agenttigi de keshe óz alqasyn ótkizdi. Qaırat Lama Sharıftyń tóraǵalyǵyndaǵy jıynǵa Memlekettik hatshy Muhtar Qul-Muhammedtiń qatysýy elimiz úshin din máselesiniń asa ózekti bolyp otyrǵanyn onan saıyn ańǵartsa kerek. Bul jaıynda «Alash aınasy» gazetiniń senbilik sanyndaǵy «Kúzge deıin qaıta tirkelmegen dinı birlestiktiń el aýmaǵyndaǵy qyzmeti toqtatylady» degen taqyryptaǵy maqalada jan-jaqty baıandalǵan. «Jańa zańda buryn bolmaǵan birqatar qaǵıdatty erejeler bekitilip, qujattyń áleýeti qazirdiń ózinde aıqyn biline bastaǵan. Máselen, zań kúshine enisimen 579 sany az dinı toptyń qyzmetine buraý salynǵan. Bul ǵana emes, dinı birlestikterdiń jalpy sanyn júıeleýde de jaǵymdy ózgeris barshylyq. 2011 jyldyń qańtarynda Qazaqstanda 4551 dinı birlestik qyzmet etse, qazirgi ýaqytta olardyń sany 3972-ge, ıaǵnı 13 paıyzǵa azaıdy», - dep jazady basylym.
«Samuryq-Qazyna» qory Elbasynyń bıylǵy Joldaýy aıasynda belgilengen «Qoljetimdi baspana» baǵdarlamasyna qatysyp, kelesi jyldyń ózinde 200 myń sharshymetr turǵyn-úıdi tapsyrýdy josparlap otyr», - dep jazady «Alash aınasy» «Samuryq-Qazyna» 3,5 mln. sharshy metr turǵyn úı salady» degen taqyryptaǵy maqalasynda. Basylymnyń atap ótýinshe, Elbasynyń tapsyrmasyna sáıkes, «Koljetimdi baspana» baǵdarlamasy aıasynda salynatyn jaldamaly turǵyn úıdiń 1 mln. sharshy metrin salý mindeti «Samuryq-Qazyna» qoryna júktelip otyr. Bul jumysty «Samuryq-Qazyna» Jyljymaıtyn múlik qory» AQ arqyly júrgizý kózdelgen. Qazirgi kezde Joldaý júktegen osy bir mańyzdy mindetke qatysty naqty jospar da joq emes. Oǵan sáıkes, 2012-2015 jyldary aralyǵynda «Samuryq-Qazyna» Jyljymaıtyn múlik qory» jáne «Samuryq-Qazynanyń» ózi kezeń-kezeńimen 500 myń sharshy metr kólemindegi jyldyq mejege shyǵýdy josparlap qoıǵan. Al qalǵan 500 myń sharshy metrdi Qurylys isteri jónindegi agenttigi óz moınyna alyp otyr.
