Álemde bar ýrannyń 20 paıyzy Ortalyq Azııada jatyr — sammıt

ASTANA. KAZINFORM — Prezıdent Qasym-Jomart Toqaev Táýelsizdik saraıyndaǵy «Ortalyq Azııa-Qytaı» sammıtinde Ortalyq Azııa men Qytaı arasyndaǵy kólik baılanysynyń keleshegine toqtaldy.

— Qazaqstan Qytaı Halyq Respýblıkasy men Ortalyq Azııa elderi úshin óńirdegi ózara kólik baılanysyn damytýdaǵy senimdi strategııalyq seriktes bolyp keldi jáne bolyp qala beredi de. Biz aýqymdy ınfraqurylymdyq jobalardy iske asyryp, jalpyǵa ortaq ekonomıkalyq damý men ıgilik jolyndaǵy tranzıttik múmkindikterimizdi keńeıtý baǵytynda ári qaraı birlesip jumys isteýge daıynbyz, — dedi Prezıdent.

Memleket basshysy aımaqtaǵy ornyqtylyqtyń negizgi faktory energetıka salasyndaǵy ózara is-qımyl bolyp otyrǵanyna toqtaldy.

— Ortalyq Azııada ýrannyń álemdik qorynyń 20%-y, munaıdyń 17%-dan astamy, tabıǵı gazdyń 7%-y, sırek kezdesetin metaldardyń aýqymdy ken oryndary shoǵyrlanǵan, — dedi Qasym-Jomart Toqaev.

Aıta keteıik, elordada «Ortalyq Azııa — Qytaı» ІІ sammıti ótip jatyr. Іs-sharaǵa Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.

«Ortalyq Azııa — Qytaı» І sammıti 2023 jyldyń 19 mamyrynda Qytaıdyń Sıan qalasynda ótken edi.