Álemde balalardyń 10 paıyzy demikpe aýrýyna shaldyqqan
ALMATY. QazAqparat - Allergııa men demikpe – Dúnıejúzinde eń keń taralǵan aýrýlardyń biri. Bronh demikpesi tynys alý joldarynyń aýrýlaryna ákeledi. Alaıda demikpeniń sebebi allergııa da bolýy múmkin. Bul týraly allergolog, ımmýnolog Araı Batyrbaeva aıtty, dep habarlaıdy QazAqparat tilshisi.
30 mamyrda dúnıejúzinde Allergııa jáne demikpemen kúresý kúni atalyp ótedi. Negizgi maqsaty – dárigerlerdiń, naýqastardyń jáne halyqtyń osy aýrýlar týraly aqparattandyrylýyn arttyrý, allergııa men demikpege baılanysty máselelerdi sheshýge qoǵamnyń nazaryn aýdarý jáne patsıentterge kórsetiletin medıtsınalyq kómektiń sapasyn arttyrý. Kardıologııa jáne ishki aýrýlar ǴZI Respýblıkalyq allergologııalyq ortalyǵy basshysynyń mindetin atqarýshy allergolog, ımmýnolog Araı Batyrbaevanyń aıtýynsha, dúnıejúzinde eresek turǵyndardyń 5%-dan astamy jáne balalardyń 10%-y demikpe aýrýyna shaldyqqan. Bronh demikpesi – túrli ishki jáne syrtqy qorshaǵan orta faktorlarynan bronhylardyń tarylýyna yqpal etetin tynys alý joldarynyń aýyr sozylmaly qabyný aýrýy.
«Ýaqytyly aldyn alsa jáne durys josparlanǵan jaǵdaıda demikpeni boldyrmaýǵa bolady. Demikpeniń aldyn alýdyń negizgi baǵyty – allergııa men tynys alý joldarynyń sozylmaly aýrýlaryn boldyrmaý. Temeki tútini nemese titirkendirgish hımııalyq zattarmen baılanysta bolatyn balalar allergııaǵa jıi shaldyǵady jáne bronh demikpesimen aýyrady. Eń keń taralǵan allergender: úıdegi shań, taraqandar, kishkentaı keneler, úı janýarlarynyń júni, zeń, tamaqtyń keı túrleri, ósimdik tozańy, – deıdi dáriger.
Araı Batyrbaevanyń aıtýynsha, bronh demikpesin aldyn alý boıynsha durys josparlanǵan jáne júzege asyrylyp jatqan sharalar – aýrýdyń aldyn alý jáne emdeýdiń tıimdi tásili.
«Zamanaýı medıtsına tájirıbesi demikpeniń aldyn alý is-sharasyn durys oryndaý kóbine aýrýdy emdeýge nemese patsıenttiń demikpege qarsy dári-dármekterdi paıdalanýyn azaıtýǵa jetkilikti ekenin kórsetti. Dıagnostıkalaý men emdeýdiń zamanaýı ádisteriniń arqasynda aýrýdy baqylaýǵa bolady»,- dedi ol.
Spıkerdiń sózinshe, durys emdeý júrgizilse, demikpemen aýyratyndardyń kóbi ony baqylap otyrýǵa, sımptomdarynan arylýǵa, ustamalardyń sırek bolýyna nemese tipti múldem bolmaýyna, arnaıy dári-dármekterdi sırek paıdalanýǵa qol jetkize alady.
