Álemde azamattyǵy joq adamdar sany 11 mıllıonǵa jýyqtaıdy
ASTANA. QazAqparat - Álemde 11 mıllıonǵa jýyq azamattyǵy joq adam bar. Bul týraly búgin Senatta «Azamattyq jáne azamattyǵy joq tulǵalar» atty anyqtamalyqtyń tusaý keseri barysynda málim boldy. Atalǵan anyqtamalyq Astanadaǵy BUU Bosqyndar jónindegi Joǵarǵy Komıssar basqarmasy ókildigimen birlese daıyndalǵan.
Tusaýkeser barysynda Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Ikram Adyrbekov bosqyndar men azamattyǵy joq tulǵalarǵa qatysty máselelerge toqtala kele, zańnamalyq jetildirýge de nazar aýdardy.
Senatordyń aıtýynsha, azamattyǵy joq kóptegen tulǵalar májbúrli túrde qonys aýdarýlardyń qurbanyna da aınalady. «Qazirgi tańda Qazaqstan Respýblıkasy bosqyndar dep tanyǵan tulǵalar Qazaqstannyń azamattyǵyn alýǵa ótinish berýdiń zań júzindegi quqyǵyna ıe emes. Sonymen qatar, is júzinde bosqyndardyń basym bóligi turǵylyqty turýǵa qatysty ótinish bergende olarǵa bas tartylyp jatady. Sosyn, Qazaqstan aýmaǵynda týǵan bosqyndardyń balalary da Qazaqstan azamaty bolyp moıyndalmaıdy, sonyń saldarynan olar azamattyǵy joq tulǵalarǵa aınalady», - dedi senator I. Adyrbekov.
Toqtala ketetin jaıt, BUU Bas Assambleıasy Uıymnyń Bosqyndar isi jónindegi Joǵarǵy Komıssary basqarmasyna azamattyǵy joq adamdardy azaıtý jáne onyń aldyn alý máselesin qadaǵalaýdy júktegen. Al sońǵy baǵalaýlarǵa júginsek, álemde shamamen 11 mıllıon adamnyń azamattyǵy joq bolyp otyr. Azamattyǵy joq degenniń ózi bilimge, medıtsınalyq qyzmetterge, zańdy jumysqa ornalasýǵa shekteý bolatynyn, emin-erkin júrip turýǵa kedergi keltiretinin bildiredi.
Aıta keteıik, anyqtamalyq halyqaralyq quqyqtyń qorǵaýynda bolǵan azamattyǵy joq tulǵalardyń quqyqtary men mindetteri týraly aqparattandyrýǵa arnalǵan.
