Álemde áıelderdiń 45 paıyzy ǵana jumys isteıdi - BUU
Baıandama avtorlary memleketter shara qoldanbasa, jaǵdaı nasharlaýy múmkin ekenin eskertedi. Oǵan sáıkes, ótken jyly áıelderdiń 45% astamy ǵana jumys istegen, al er adamdardyń jumyspen qamtylý deńgeıi 71% asqan. Sonymen qatar, jahandyq saýalnamaǵa qatysqan áıelderdiń 70% jumys istegisi keletinin aıtqan, al erlerdiń 66,5% áıelderdiń bul oıyn qoldaǵan.
«Áıelder aqy tólenetin jumys istegisi keledi, biraq oǵan aqy tólenbeıtin úı sharýalary jıi kedergi keltiredi. Qandaı genderlik kórsetkishter men kedergilerdi eskersek te, bári ózgelerge qamqorlyq jasaý jumysyna baılanysty boldy. Áleýmettik normalar da áli kúnge deıin áıelderge «kútýshi», erlerge - «tabysker» rólin tańady», - delingen baıandamada.
Halyqaralyq eńbek uıymynyń (HEU) málimetine sáıkes, balasyz áıelderge qaraǵanda, analarǵa jumys tabý óte qıyn. Onyń ústine, balaly áıelderge az eńbekaqy tólenedi. Erler arasynda, kerisinshe, balalarynyń ómirge kelýi jalaqysynyń kóptigin bildiredi.
Sonymen birge, HEU sarapshylary aýyr jaǵdaıda jáne biliktiligi tómen jumystardy atqaratyndar arasynda áıelderdiń erlerden áldeqaıda basym ekenin aıtady.
Álem boıynsha basshylyq oryndarda áıelderdiń 27% ǵana otyr. Sońǵy otyz jylda bul kórsetkish ózgergen joq. Alaıda, áıelder erlerge qaraǵanda mansaptyq satyda tez kóteriledi. Kóshbasshy áıelderdiń jasy laýazymdy er adamdardan shamamen bir jylǵa tómen. Sonymen qatar, áıel menedjerler arasynda er basshylarǵa qaraǵanda, magıstranttar, kandıdattar nemese doktoranttar kóp.
Halyqaralyq eńbek uıymy álem elderiniń úkimetterin jumys isteıtin áıelderdi qoldaıtyn saıasatty júrgizýge shaqyrady. Atap aıtqanda, qajetti ınfraqurylymdy jasaý jáne áıelderdiń dekrettik demalystan keıin laıyqty jumysqa tezirek oralýyna yqpal etýdi usynady.
